काठमाडौं । चलचित्र ‘पिताम्बर’को छायांकन सुरु भएको छ । बालाजुस्थित एनएफडीसी ल्याबबाट छायांकन सुरु गरिएको हो ।

निर्देशक कृषा चौलागाईंले दोस्रो चरणको छायांकनको पहिलो दिन अभिनेता प्रदीप खड्का र सौगात मल्लको मुहूर्त सट लिइएको बताइन् । अभिनेता अनुपविक्रम शाही र अभिनेत्री आँचल शर्माबाहेक सवै कलाकारले सिनेमाको छायांकन सुरु गरेको जानकारी गरेको उनको भनाइ छ । 

केही दिनमा काठमाडौंको छायांकन सकेर निर्माण टिम बाँकी छायांकनका लागि नवलपरासी पुग्नेछ । सिनेमाको पहिलो चरणको छायांकन पनि नवलपरासीमा नै गरिएको थिो । 

चलचित्रमा सौगात र प्रदीपसँगै दयाहाङ राई, आँचल शर्मा, प्रमोद अग्रहरि, अनुप विक्रम शाही, दिव्य देव, सुरक्षा पन्त, कामेश्वर चौरासिया, सुपुष्पा भट्ट, गौरव विष्ट, विशाल पहारीको अभिनय रहने छ । सिनेमामा अभिनेता आर्यन सिग्देल पनि विशेष भूमिकामा छन् ।  

केपी फिल्मस्ले पुरुषोत्तम प्रधान फिल्मससँग सहकार्य गरेको ‘पिताम्बर’लाई पुरुषोत्तम प्रधानले खिचिरहेका छन् । सिनेमाको निर्मातामा विशाल चौलागाईं छन् । प्रदीप भारद्वाजको लेखन रहेको चलचित्रको बजेट ५ करोड भएको बताइएको छ ।