काठमाडौं । कलंकीमा रहेको नेपाल नेसनल अस्पतालले जोखिमपूर्ण फोहोरको उचित व्यवस्थापन नगरेको भेटिएको छ । काठमाडौं महानगरपालिकाको वातावरण व्यवस्थापन विभागको अनुगमनका क्रममा अस्पतालबाट उत्पादित फोहोरको व्यवस्थापनमा चरम लापरबाही देखिएको विभागका वरिष्ठ शाखा अधिकृत सानुमैया महर्जनले जानकारी दिए ।

अस्पतालले २०८० फागुनमा जोखिमपूर्ण फोहोर निर्मलीकरण गरेर व्यवस्थापन गर्ने प्रतिबद्धता गरेको थियो । यसपछि २०८० चैत १० गते गरिएको अनुगमनमा पनि फोहोर व्यवस्थापन सुधार गरिएको थिएन । अस्पतालले फोहोर व्यवस्थापन गर्ने प्रतिबद्धता दोहोर्‍याएपछि अनुगमन टोली सुधारको मौका दिएर फर्किएको थियो ।

यसपछि चैत १६ गते अस्पतालबाट एक जना व्यवस्थापक र एक जना फोहोर व्यवस्थापनका फोकल पर्सनलाई बोलाएर स्वास्थ्य संस्थाजन्य फोहोर व्यवस्थापनसम्बन्धी एकदिने तालिम दिइएको थियो ।

यी सबै प्रयासपछि अस्पतालले संक्रमित फोहोर व्यवस्थापनमा चरम लापरबाही गरेको देखिएको महानगरले बताएको छ । अस्पतालले बारम्बार फोहोर व्यवस्थापनमा लापरबाही गरेपछि महानगरले अस्पतालको फोहोर संकलन रोक्ने बताएको छ । 

गत वर्ष महानगरपालिकाको भौगोलिक क्षेत्रभित्र सञ्चालनमा रहेका ५० वटा अस्पतालको फोहोर व्यवस्थापन अवस्था अनुगमन गरिएको थियो । यस क्रममा गलत अभ्यास भएका २० वटा अस्पतालको फोहोर संकलनमा रोक लगाइएको थियो ।