काठमाडौं । गत बिहीबार चलचित्र एक्टरको फर्स्टलुक पोस्टर सार्वजनिक भयो । पोस्टरमा चलचित्रका मुख्य नायक प्रदीप खड्का फिचर्ड छन् । 

पोस्टरमा प्रदीपका पाँचवटा लुक्स छन् । जसमध्ये घाइते लुक, पाइलटको पोसाकमा रहेको लुक्स, नेपाली पोसाकमा रहेको लुक्स, लामो कपालमा क्याजुअल पोसाकमा रहेको लुक र जाडोमा स्वेटर लगाएको लुक्स छन् । यी पाँच लुक्समध्ये टाउको र अनुहारमा चोट लागेको लुक्सलाई पोस्टरमा प्राथमिकता दिइएको छ । जसमा उनको टाउको ब्यान्डेज छ भने गाला र नाटकमा लागेको चोटमा टेप टाँसिएको छ । एउटा हात प्लास्टर गरिएको छ भने अर्को हातले टेकेको वैशाखीको सहाराले उनी उभिएका छन् । 

यसबाहेक उनको अर्को पाइलटको पोसाकमा रहेको लुक ठिकै छ । बाँकी लुक सामान्य तस्बिरभन्दा खासै फरक छैनन् । सामान्य अवस्थामा फेसबुकमा उनले पोस्ट गर्ने तस्बिरभन्दा पोस्टरमा आएका लुक फरक छैनन् । पोस्टरमा मेकरले खासै मिहिनेत गरेको देखिँदैन । 

स्रोतका अनुसार प्रदीप स्वयं पनि सिनेमाको यो फर्स्ट लुकलाई लिएर सन्तुष्ट छैनन् । उनले निर्माणपक्षसँग यस विषयमा असन्तुष्टि रहेको स्रोतको भनाइ छ । 

“पोस्टर राम्रो भएन । सिनेमाको क्यारेक्टर अनुसार बन्नुपर्थ्यो, यो त फ्यान भयो यसले राम्रो गर्दैन भनेर प्रदीपजीले भन्नुभयो,” प्रदीपलाई उदृत गर्दै स्रोतले भन्यो, “निर्माणपक्षले रस भयो भन्ने जवाफ दियो । तर उहाँले यसले सिनेमाको हाइप बनाउनेभन्दा पनि डामाडोल बनाउँछ ।” 

पोस्टरकै लागि भनेर डेढ हप्ता अगाडि प्रदीपको फोटो सुट गरिएको थियो । तर, अपेक्षित पोस्टर नआउँदा प्रदीपले मेकरसँग असन्तुष्टि जनाउनु परेको हो ।  ‘एक्टर’लाई राजन भुसालको निर्देशन गरेका छन् । 

यस्तै, पल शाह मुख्य भूमिकामा रहेको चलचित्र ‘रावायण’मा पनि केही कमजोरी देखिएका छन् । उनको गेटअप फरक देखाउन प्रयोग गरिएको विग र जुँगा दारी नक्कली रहेको प्रस्टै देखिन्छ । केही दिन अगाडि ट्रेलर सार्वजनिक कार्यक्रममा नै यसबारे निर्देशक सुदर्शन थापा र पलमाथि यो प्रश्न उठेको थियो । उनीहरूले यसबारे बचाउ गरेका थिए । 

एक्सन भूमिकामा रहेका पलले प्रयोग गरेका दारी र जुँगा नक्कली हो भन्ने प्रष्ट देखिन्छ । पछिल्लो समय कलाकारले जीवन्त क्यारेक्टर देखाउन कपाल पाल्ने, शरीर मोटो बनाउन ‘वेट गेन’ गर्ने तथा दुब्लो पातलो देखाउन ‘वेट लुज’ गर्ने गरेका छन् । 

यसको पछिल्लो उदाहरणका रूपमा चलचित्र ‘अगस्त्य च्याप्टर–१’मा सौगात मल्लले गरेको मिहिनेतलाई लिन सकिन्छ । उनी यो सिनेमाको क्यारेक्टरमा रियल पात्रजस्तै देखिएका छन् । 

तर, ‘रावायण’मा पलको हकमा यो मिहिनेत क्याक्टर निर्माणमा हालसम्मका यो सिनेमाका बाहिर आएका कन्टेनमा देखिएको छैन ।

नेपाली चलचित्र उद्योगमा सिनेमाको ‘कथाले माग्यो’ भन्ने भनाइ चर्चित छ । तर, कतिपय निर्माण टिमले भने यसलाई खासै वास्था गरेको देखिँदैन । कथा अुनसार कलाकार चयन गर्न नसक्दा वा नचाहँदा त्यसको नकारात्मक असर चलचित्रमा प्रस्टै देखिन्छ ।