सुदूरपश्चिम । कैलालीको धनगढी उपमहानगरपालिका–४ मा आज शंकास्पद वस्तु फेला परेको घटनापछि बसेको जिल्ला सुरक्षा समितिको बैठकमा सुरक्षा व्यवस्थालाई चुस्त एवं प्रभावकारी बनाउनेबारे छलफल गरिएको छ । 

नेपाली कांग्रेसका सभापति एवं पूर्वप्रधानमन्त्री शेरबहादुर देउवाको धनगढी उपमहानगरपालिका–४, स्थित घर अगाडिको सडकमा फेला परेको शंकास्पद वस्तुलाई नेपाली सेनाको बम डिस्पोजल टोलीले बिहान निष्क्रिय बनाएको छ ।

सुरक्षा समितिको बैठकमा सुरक्षा व्यवस्थालाई थप चुस्त एवं प्रभावकारी बनाउने बारेमा छलफल भएको कैलालीका प्रमुख जिल्ला अधिकारी धर्मेन्द्रकुमार मिश्रले जानकारी दिए । देउवाको घर परिसरमा चौबिसै घण्टा प्रहरीको पहरा रहने गरे पनि शंकास्पद वस्तु भेटिनुमा सुरक्षा कमजोरी भएको हुन सक्ने प्रजिअ मिश्रले बताए । 

उनले भने, “घटनास्थलमा कुनै पर्चा पम्प्लेट भेटिएको छैन, घटना शंकास्पद रहेको छ । फेला परेको उक्त वस्तु बम हो होइन भन्नेमा छानबिन भइरहेको छ, साँझसम्म पुष्टि भइसकेको छैन ।”

घरभित्र प्रवेश गर्ने मूल प्रवेशद्वार नजिकको सडकमा ‘विद्युतीय कितली’भित्र टिफिनको डब्बा फेला परेको थियो । उक्त वस्तु बम भएको आशंका गरिएको छ । 

गए राति १ बजेको समयमा शंकास्पद वस्तु फेला परेको सूचना पाएपछि राति नै प्रहरीको टोली घटनास्थलमा पुगेको थियो । घरमा पूर्वप्रधानमन्त्री देउवाका भतिजा सुदूरपश्चिम प्रदेशसभा सदस्य प्रकाशबहादुर देउवा बस्दै आएका छन् । घटनाको अनुसन्धान र संलग्न हुनेको खोजीलाई प्रहरीले तीव्र बनाएको छ । रासस