काठमाडौं । कृषि तथा पशुपन्छी विकासमन्त्री रामनाथ अधिकारीले आउँदो दसैँअघि दुग्ध र उखु किसानको बक्यौता भुक्तानी गरिने बताएका छन् ।

मन्त्री भएपछि आइतबार पहिलोपटक पत्रकार सम्मेलन गरेका उनले दुग्ध किसानको बक्यौतामध्ये ३३ करोड ५७ लाख रुपैयाँ भुक्तानी गरिएको जानकारी गराए । बाँकी रकम सकेसम्म भदौभित्रै भुक्तानीको प्रयास गरिने उनले उल्लेख गरे । उनले भदौभित्र सम्भव नभए दसैँअघि बक्यौता भुक्तानी गरिसक्ने बताए ।

दुग्ध किसानको अझै एक अर्ब २७ करोड रुपैयाँ भुक्तानी दिन बाँकी छ । उखु किसानको हालसम्म भुक्तानी बाँकी बक्यौता एक अर्ब ३० करोड रुपैयाँ छ ।

यस्तै, रासायनिक मलको वितरण तथा उपलब्धताका विषयमा जानकारी दिन कल सेन्टर सञ्चालनमा ल्याइएको छ । मन्त्रालयले पैसा नलाग्ने टोलफ्री नम्बर १६६००१७७७७९ सञ्चालनमा ल्याएको हो । समस्याका विषय फोनमार्फत कल सेन्टरमा टिपाउन किसानलाई मन्त्री अधिकारीले आह्वान गरे ।

रासायनिक मल खरिदको प्रक्रियाका निम्ति आफूले ५७ दिनको समय कायम गर्न खोजेको उनले बताए । हाल त्यो ११६ दिनको समय रहेको उनले उल्लेख गरे ।