काठमाडौं । नेकपा (माओवादी केन्द्र)का उपमहासचिव वर्षमान पुनले आफूहरूलाई सरकारमा जान हतारो नभएको बताएका छन् । पार्टीसम्बद्ध विद्यार्थी संगठन अखिल क्रान्तकारी प्युठानको जिल्ला सम्मेलनमा आइतबार उनले वर्तमान सरकारले भ्रष्टाचारी र राज्यदोहनमा संलग्नलाई संरक्षण गर्ने नीति लिएको आरोप लगाए ।

“हामीलाई सरकारमा जान कुनै हतारो छैन । तर, सुरुआत भएका राम्रा कामको निरन्तरताका लागि सरकारलाई खबरदार गर्न चाहन्छौँ,” उनले भने, “सुशासन र समृद्धिको यात्रामा काम गर्दा सरकारलाई साथ दिन चाहन्छौँ । भ्रष्टाचारीलाई संरक्षण गरिए संसद् र जनताका बीचमा रहेर खबरदारी गर्छौँ ।”

अध्यक्ष पुष्पकमल दाहाल ‘प्रचण्ड’ नेतृत्वको तत्कालीन सरकारले सुशासनका पक्षमा तथा भ्रष्टाचार र राज्यदोहनविरुद्ध कठोर कदम चालेपछि आत्तिएकाले रातारात सरकार ढालेको उनको भनाइ थियो ।

“हाम्रो अध्यक्ष प्रचण्ड नेतृत्वको सरकारले चलाएको सुशासनको अभियानलाई अनियमितता, राज्यदोहन र सरकारी सम्पत्ति कब्जा गरेर मोज गरिरहेका मानिसहरूले मन पराएनन्,” पुनले भने, “म यो सरकारलाई भन्न चाहन्छु– हाम्रो पार्टी नेतृत्वको सरकारले थालेको भ्रष्टाचार र राज्यदोहनविरुद्धको अभियान नरोकियोस् ।”

भ्रष्टाचार र राज्यदोहनको प्रक्रिया नरोकिए नेपालमा श्रीलंका र बंगलादेशको परिस्थिति आउन सक्नेतर्फ उनले सचेत गराए ।