काठमाडौं । नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले आफूहरू एकताबद्ध भएर केन्द्रीय कमिटी बैठकमा जाने बताएका छन् । शनिबार पार्टी केन्द्रीय कार्यालय पेरिसडाँडामा आयोजित पोस्टबहादुर बोगटी स्मृति प्रतिष्ठानको नवौँ वार्षिक साधारणसभामा उनले यस्तो बताएका हुन् ।

स्थायी कमिटी बैठकमा केही सदस्यले भिन्न ढंगले धारणा राखेको उनले उल्लेख गरे । उनले पार्टी उपमहासचिव जनार्दन शर्माले लिखित रूपमा आफ्नो धारणा राखेको र त्यो फरक मत नरहेको बताए ।

उपमहासचिव शर्माले पार्टी फुटाउन खोजेको नेतृत्वबाट नभनिएको उनले जिकिर गरे । उनले स्थायी कमिटी बैठकको अन्त्यसम्म आउँदा पार्टी फुटाउने शर्माको कुनै नियत र उद्देश्य छैन भन्ने स्पष्ट भएको पनि बताए ।

आफूलाई केही मानिसले पार्टी फुटाउन लागेको भन्ने हल्ला सुनाएकाले संशय भने पैदा भएको प्रचण्डको स्वीकारोक्ति थियो । उनले शर्माले पार्टी फुटाउन खोजेको भन्ने भ्रमबाट मुक्त हुन आग्रह समेत गरे ।

पार्टी अब नफुट्ने उनले जिकिर गरे । उनले शर्माले उठाएका केही विषय गम्भीर आशंकाका रहेको बताए ।

कार्यक्रममा प्रचण्डको भनाइ पढ्नोस्–
स्थायी कमिटीको बैठकमा जब हामी गयौँ, केही कमरेडले अलि भिन्न ढंगले राख्नुभएको थियो । सबैलाई थाहा नै छ । कमरेड जनार्दन शर्माले लिखित रूपमा राख्नुभएको थियो । उहाँले मेरो फरक मत हो भनेर त राख्नुभएको थिएन । त्यहाँ फरक मत भनेर लेखिएको पनि छैन । उहाँले आफ्नो मतको रूपमा राख्नुभयो । यो मेरो फरक मत होइन, मत मात्रै हो, अरू साथीहरूले मुखले भन्नुभयो, मैले लेखेर भनेको मात्रै हो भनेर स्पष्ट पनि पार्नुभयो । तर, बाहिर के हो ? भन्ने आशंका र तरंग पैदा भयो । स्थायी समितिको बैठकको अन्त्यसम्म आइपुग्दा हामीले त्यसलाई मुख्य रूपमा सम्बोधन गर्‍यौँ । जनार्दन शर्मा ‘प्रभाकर’ले पार्टी फुटाउन खोजेका छन् भनेर लिडरसिपले त्यो भाषा त कहिल्यै भनेको थिएन । तर, विभिन्न मानिसहरूले आएर सुनाउने गरेका थिए । त्यसले यदाकदा के हो ? भन्ने भएको थियो । स्थायी कमिटीको अन्त्यसम्म आउँदा पार्टी फुटाउने जनार्दन शर्माको कुनै नियत र उद्देश्य छैन भन्ने स्पष्ट पार्नुभएको छ । जनार्दन शर्माले पार्टी फुटाउन खोज्यो भन्ने भ्रमबाट मुक्त हुन आग्रह गर्दछु । पार्टी फुट्दैन, त्यो सुनिश्चित भएको छ । अब एकताबद्ध भएर जाने हो । कसैले भन्दैमा त्यो आशंका राख्न परेन । उहाँले उठाएका गम्भीर आशंकाका विषय छन् । व्यावहारिक कुराहरू आशंकाका छन् । ती पनि स्थायी समितिको बैठकको अन्त्यसम्म आउँदा क्लियर हुने भनेको छु । न्युज एजेन्सी नेपाल