पोखरा । सहकारी ठगी प्रकरणमा स्याङ्जाको बिरुवा गाउँपालिकाका अध्यक्ष सूर्यबहादुर कुँवरविरुद्ध पक्राउ पुर्जी जारी भएको छ ।

जिल्ला प्रहरी कार्यालय स्याङजाले सोमबार अध्यक्ष कुँवरसहित थप दुई जनालाई पक्राउ अनुमतिका लागि निवेदन दिएको थियो । प्रहरीको निवेदन अनुसार नै जिल्ला अदालत स्याङ्जाले कुँवरलाई पक्राउ गर्न अनुमति दिएको हो ।

कुँवरबाहेक तारेन्द्रबहादुर केसी र सन्ध्या भण्डारीविरुद्ध पक्राउ पुर्जी जारी भएको हो । भण्डारी मुक्तिनाथ विकास बैंकको बिरुवा शाखाका कार्यालयमा कस्टमर सर्भिसको कर्मचारी थिइन् ।

उनीहरूविरुद्धको पक्राउ पुर्जीलाई स्याङ्जा प्रहरीले भने सामान्य अनुसन्धानका लागि बोलाउन लागिएको जनाएको छ । स्याङ्जाका प्रहरी प्रमुख प्रहरी उपरीक्षक शालिग्राम शर्मा पौडेलले सामान्य सोधपुछका लागि बोलाउन लागिएको प्रतिक्रिया दिए ।

जिल्ला प्रहरी कार्यालय स्याङ्जाका एक अधिकारीले भने पक्राउ अनुमति लिएको स्वीकार गरे । “त्यो पत्र कसरी लिक भयो हामी अनुसन्धान गर्दै छौँ । छानबिनका लागि बोलाएर बयान लिने काम त भइरहेको हुन्छ, यो खासै ठुलो इस्यू होइन,” ती अधिकारीले भने ।

जिल्ला प्रहरी कार्यालय स्याङ्जाले गत साउन ११ गते सहकारीको बिरुवा सेवा केन्द्रका प्रमुख जीवन वाग्लेलाई पक्राउ गरेको थियो । यस सहकारीमा बचतकर्ताको रकम हिनामिना भएको भन्दै ध्रुवनारायण श्रेष्ठले साउन १० मा जाहेरी दिएका थिए । त्यसकै आधारमा पक्राउ परेका वाग्लेले नै गाउँपालिका अध्यक्षको नाम पोलेपछि उनलाई पनि अनुसन्धानमा बोलाउन लागिएको स्याङ्जा प्रहरीले जनाएको छ ।

वाग्ले पक्राउ परेपछि नै प्रहरीले २० गतेभित्र बचतकर्तालाई उजुरी दिन आग्रह गरेको थियो । सोही आधारमा प्रदेशको सहकारी रजिस्ट्रार कार्यालयले यो सहकारीमाथि छानबिन गरेको थियो ।

छानबिनको क्रममा सावाँ र ब्याजसहित गरी कुल तीन करोड ६६ लाख ९३ हजार रुपैयाँ हिनामिना भएको देखिएको छ ।

“सहकारी सम्बन्धमा पीडितहरूले जाहेरी दर्ता गरेपछि कारबाही प्रक्रिया अगाडि बढाएका हौँ । सहकारी ऐन अनुसार विज्ञ टोली ल्याएर प्रदेश रजिस्ट्रार कार्यालयबाट छानबिन गरेका छौँ । छानबिन सकिइसकेको छैन । अनुसन्धान जारी छ । अनुसन्धानको क्रममा मान्छे उपस्थित गराउने, बोलाएर सोध्ने, खोज्ने, अनुसन्धानमा कतै जोडिएको खण्डमा बोलाएर सोध्ने हाम्रो अनुसन्धान प्रक्रियाको पाटो हो,” ती अधिकारीले भने ।

अध्यक्ष कुँवर कुनै बेला सहकारीमा सचिव थिए । “तत्कालीन अवस्थामा उहाँ सहकारीको सचिव हुनुहुन्थ्यो, अनुसन्धानको दायरामा तानिएपछि उहाँलाई बोलाइएको हो,” प्रहरी प्रमुख पौडेलले भने ।

उनी गाउँपालिका अध्यक्ष हुनुभन्दा अगाडि नै सहकारीमा रहेको र निर्वाचनका बेला उक्त सहकारीबाट ऋण लिएको स्रोत बताउँछ ।