काठमाडौं । प्रतिपक्ष दल राष्ट्रिय प्रजातन्त्र पार्टी (राप्रपा)का सचेतक बिना लामाले हवाई, सार्वजनिक सवारीसाधनको दुर्घटनाबाट जनतालाई बचाउने गरी ‘सेफ्टी एक्ट’ विधेयक ल्याउन सरकारसँग माग गरेकी छन् । मंगलबार प्रतिनिधिसभा बैठकको आकस्मिक समयमा बोल्दै उनले यस्तो माग गरिन् । 

उनले जनताको ज्यान र धनको सुरक्षा गर्ने तथा सुरक्षित यात्राको ग्यारेन्टी गर्न यस्तो विधेयक आवश्यक भएको बताइन् । 

“सुरक्षित यात्रा गर्न विशेष गरेर सेफ्टी एक्ट ल्याएर जनताको यात्रा सुरक्षित बनाउन सभामुखमार्फत सरकारको ध्यानाकर्षण गराउँछु,” उनले भनिन् । 

यस्तै, रास्वपा सांसद सोविता गौतमले हवाई क्षेत्रमा गम्भीर समस्या देखा परेको भन्दै राष्ट्रियसभाबाट अघि बढ्न नसकेको विधेयकलाई चाँडो अघि बढाउन माग गरिन् । “प्रधानमन्त्री केपी शर्मा ओलीले राष्ट्रियसभामा भएको विधेयक सदनमा ल्याइयोस्,” उनले भनिन् ।