काठमाडौं । चेल्सीले फरवार्ड पेड्रो नेटालाई ५४ मिलियन पाउन्डमा अनुबन्ध गरेको छ । २४ वर्षीय नेटोलाइ चेल्सीले वुल्भ्सबाट सन् २०३१ सम्मका लागि भित्र्याएको हो । 

पोर्चुगलका फरवार्डलाई चेल्सीले आइतबार घरेलु मैदान स्टाम्फोर्ड ब्रिजमा सार्वजनिक समेत गरेको थियो । “म क्लबमा अनुबन्ध हुन पाउँदा निकै खुसी छु । मैले यहाँसम्म आउन करियरमा धेरै मेहनत गरेको छुँ । र, म यो क्लबको जर्सीबाट मैदान उत्रिन उत्साहित छु,” सम्झौतापछि नेटोले भने । 

चेल्सीले यसअघि दुईपटक प्रस्ताव गरे पनि वुल्भ्सबाट अस्वीकृत भएको थियो । चेल्सीले सुरुआतमा नेटोका लागि वुल्भ्सलाई ५१.३ मिलियन पाउन्ड तिर्नेछ । यसपछिको बाँकी २.६ मिलियन पाउन्ड भने ‘एड वान्स’को रूपमा तिर्नेछ । नेटो सन् २०१९ मा इटालियन क्लब लाजियोबाट वुल्भ्समा अनुबन्धित भएका थिए । वुल्भ्सबाट पाँच वर्ष खेल्दा उनले १३५ खेलमा १४ गोल गरेका छन् ।