काठमाडौं । नेपाली कांग्रेसका केन्द्रीय सदस्य अर्जुननरसिंह केसीले पार्टीको हरेक क्षेत्रमा गुणतन्त्र (मेरिटोक्रेसी)भन्दा आफ्ना मानिसलाई पुरस्कारतन्त्र हाबी देखिएको भन्दै नेतृत्वको आलोचना गरेका छन् । सानेपामा जारी पार्टी केन्द्रीय समितिको आइतबारको बैठकमा उनले कसुर हेरी दण्ड र क्षमताअनुसार पुरस्कृत गरिनुपर्नेमा जोड दिए ।

“आगो लगाउने नेतृत्व होइन, आगो निभाउने, उत्तेजना होइन, चेतना, आवेग होइन, विवेक, तोड्ने होइन, जोड्ने नेतृत्व आजको आवश्यकता छ । यो प्रशिक्षण पार्टीका हरेक तहमा पुग्नु जरुरी छ । यसैबाट पार्टीभित्र सम्पूर्ण एकता कायम हुनसक्छ‚” बैठकमा उनले भने ।

जनभावना र कार्यकर्ताको आवाजलाई ‘झुलबाहिर लामखुट्टे कराएको’ ठान्न नहुने उनले बताए । त्यस्तो ठानिए प्राप्त हुने प्रतिक्रिया घातक हुन सक्ने उनको भनाइ थियो ।

पार्टी दुर्बल हुँदा लोकतन्त्र बलियो नहुने उनले उल्लेख गरे । निश्चित नीति, विधि, पद्धति र प्रक्रियाभित्र रहेर गुट–उपगुट, गिरोह–उपगिरोहभन्दा माथि उठ्नुपर्नेमा उनले जोड दिए ।

“यसको समन्वयकारी भूमिका आजको आवश्यकता हो । यसको लागि सभापतिजीलाई हाम्रो सहयोग हुनुपर्छ । पार्टीको समग्र एकता पार्टीको निमित्त मात्र होइन, राष्ट्र र प्रजातन्त्रको संकट सम्बोधन गर्न अनिवार्य भएको छ‚” उनले भने ।