पेरिस । शरणार्थी ओलम्पिक टोलीका सदस्य अफगानिस्तानकी ‘ब्रेक डान्सर’ मनीजा तलाशलाई ‘अफगानी महिलालाई स्वतन्त्र गर’ लेखिएको पहिरन प्रदर्शन गरेकाले पेरिस ओलम्पिबाट अयोग्य घोषित गरिएको विश्व डान्स स्पोर्ट्स महासंघले शनिबार जनाएको छ ।

२१ वर्षीया बी–गर्ल तलाश नेदरल्यान्ड्सको इन्डिया सार्डजोविरुद्धको पहिलो प्रतिीपर्धाको ठिकअघि शुक्रबार नारासहितको निलो पहिरन पहिरिएर प्रस्तुत भएकी थिइन् । “शरणार्थी टोलीका सदस्य एथलिट बी–गर्ल तलाशले ओलम्पिक अधिकारपत्रको नियम ५० को उल्लंघन गर्दै आफ्नो पोसाकमा राजनीतिक नारा प्रदर्शन गरेकोमा अयोग्य घोषित गरिएको हो,” डान्स स्पोर्ट्स महासंघले विज्ञप्तिमा जनाएको छ ।

नियम ५० ले कुनै पनि ओलम्पिकस्थल वा अरू क्षेत्रमा प्रदर्शन वा राजनीतिक, धार्मिक वा जातीय प्रचारमा प्रतिबन्ध लगाएको छ ।

सन् २०२१ देखि तालिबानको नियन्त्रणमा रहेको काबुलमा जन्मिएकी तलाश देशबाट भागेर आफ्ना दुई दाजुभाइसँग स्पेनमा बस्दै आएकी छन् । “मैले तालिबानसँग डराएर वा अफगानिस्तानमा बस्न नसकेर देश छाडेको होइन । मैले अफगानिस्तानका महिलाहरूका लागि, आफ्नो भविष्यको लागि देश छाडेको हो,” उनले प्रतियोगिता अघि भनेकी थिइन् ।

“मैले आफ्नो लक्ष्य पूरा गर्ने जोखिम लिएँ । मेरो हृदयमा डर छ, तर म हार मान्दिनँ,” उनले सन् २०२१ मा एएफपीलाई भनेकी थिइन् ।

पेरिस ओलम्पिकमा साइक्लिङ, एथलेटिक्स, पौडी र जुडोमा तालिबान सरकारले स्वीकार नगरेका तीन महिलासहित ६ खेलाडीले अफगानिस्तानको प्रतिनिधित्व गरेका थिए । रासस/एएफपी