ढाका । बंगलादेशका प्रधानमन्त्री शेख हसिना बाजेदले आन्दोलनको बलमा सोमबार राजीनामा दिएर देश छोडे पनि अब बंगलादेशमा के हुन्छ भन्ने अन्योल यथावत छ । 

तत्काललाई सेनाको रेखदेखमा मुलुकको सुरक्षाव्यवस्था भए पनि अब अन्तरिम सरकारमा को–को सामेल हुन्छन् भन्ने बारेमा तय भइसकेको छैन । 

अन्तरिम सरकारमा को हुन्छ र विद्यार्थीले त्यो स्वीकार गर्छन् कि गर्दैनन् भन्नेले महत्व राख्नेछ ।  बंगलादेशमा अझै पनि तनाव कम भइसकेको छैन । पूर्वप्रधानमन्त्री तथा हसिनाका कट्टर प्रतिद्वन्दी खालिदा जियाले सर्वसाधारणलाई शान्त हुन आग्रह गरेकी छन् । 

चुनावी प्रक्रियाबाट नै आएको पूर्ववर्ती सरकार आन्दोलनको बलमा हटेपछि त्यहाँको लोकतन्त्र के हुन्छ भन्ने बारेमा अन्तर्राष्ट्रिय जगतबाट चासो व्यक्त भइरहेको छ । उनीहरूले लोकतन्त्रको सुनिश्चितता खोजेका छन् । 
बंगलादेशको प्रभावशाली छिमेकी भारत भने अहिलेसम्म सार्वजनिक रूपमा बोलिसकेको छैन । 
सेनाले त्यहाँको सत्ता लिइहाल्ने अवस्था भने नभएको अन्तर्राष्ट्रिय समाचारहरूमा जनाइएको छ । ती समाचारअनुसार सेनाले सत्ता लिएमा संयुक्त राष्ट्रसंघको शान्ति स्थापना मिसनबाट उसले हात धुनुपर्ने भएकाले सेनाले अन्तरिम सरकारकै लागि पहल गर्नेछ । 

सेना प्रमुखले अन्तरिम सरकार बन्ने सोमबार पनि बताइसकेका छन् । यद्यपि, अन्तरिम सरकारमा को–को हुन्छन् भन्ने प्रष्ट भइसकेको छैन । आगामी २४ घण्टा भित्र त्यसबारेमा प्रष्ट हुन सक्ने जनाइएको छ । 

पूर्वप्रधानमन्त्री शेख हसिना सोमबार साँझ करिब सवा ६ बजे भारतको गाजियावादको डासनास्थित भारतीय वायुसेनाको हवाई अड्डामा सी–१३० विमानबाट उत्रिएकी थिइन् । 

साँझ करिब साढे ७ बजे भारतका राष्ट्रिय सुरक्षा सल्लाहकार अजीत डोभलले शेख हसिनासँग कुराकानी गरेको बीबीसी हिन्दीले जनाएको छ । भारत सरकारले सोमबार राति बंगलादेशको अवस्थाको बारेमा छलफल गर्न उच्चस्तरीय बैठक गरेको समेत जनाइएको छ । तर, सो बैठकमा के भयो भन्ने सार्जजनिक गरिएको छैन ।

एएफपीका अनुसार सोमबार शेख हसिनाले देशको नाममा सम्बोधन रेकर्ड गर्न चाहेको भए पनि त्यो मौका उनलाई दिइएको थिएन ।  एजेन्सी