सर्लाही । सर्लाहीको लालबन्दी नगरपालिकास्थित साझेदारी वन क्षेत्रमा बेपत्ता एक पुरुष मृत फेला परेका छन् । लालबन्दी नगरपालिका–७, घिसिङटोलका ६१ वर्षीय खिलराज खड्का वनमा शनिबार मृत फेला परेका हुन् ।

शुक्रबार घाँस लिन भन्दै साइकल लिएर हिँडेका उनी राति अबेरसम्म पनि घर नफर्किएपछि परिवारले प्रहरीलाई खोजतलासका निम्ति खबर गरेको थियो । खोजीका क्रममा लालबन्दी नगरपालिका–८ स्थित साझेदारी वनमा शनिबार खड्का मृत फेला परेका जिल्ला प्रहरी कार्यालय सर्लाहीका प्रवक्ता एवं प्रहरी नायब उपरीक्षक दीपक श्रेष्ठले जानकारी दिए ।

प्रहरीले शवनजिकै घाँस बाँधेको साइकल, झोलामा पोको पारेको घाँस काट्ने कचिया, खुकुरी र पानी पिउने बोतल फेला पारेको छ । खबर पाएलगत्तै जिल्ला प्रहरी कार्यालयका प्रमुख प्रहरी उपरीक्षक रवीन्द्रबहादुर सिंह नेतृत्वको टोली घटनास्थल पुगेको थियो ।

शव शवपरीक्षणपश्चात् आफन्तको जिम्मा लगाइएको र घटनाको सूक्ष्म अनुसन्धान भइरहेको प्रहरीले जनाएको छ । रासस