काठमाडौं । पूर्वखानेपानीमन्त्री मणि थापाले करिब एक वर्षअघि नै एमाले परित्याग गरेको खुलाएका छन् । उनले बाह्रखरीसँगको संक्षिप्त कुराकानीमा आफूले ०८० भदौमा नै राजीनामा दिएको बताए ।

“मैले एक वर्षअघि नै राजीनामा दिएको थिएँ । ०८० भाद्र १२ गते कार्यालयमा राजीनामा पठाएको थिएँ । कहिले स्वीकृत हुन्छ भन्ने प्रतिक्षामा थिए । अहिले स्वीकृत गर्नुभएछ क्यारे,” उनले बाह्रखरीसँग भने, “आधिकारिक जानकारी आएको छैन । मिडियाबाट सुनिरहेको छु ।”

• मणि थापा एमालेबाट ‘आउट’

नेकपा विभाजन हुँदा एमालेमा नै रहेका थापाले स्थायी कमिटी सदस्यको जिम्मेवारी पाएका थिए । उनलाई तत्कालीन प्रधानमन्त्री एंव एमाले अध्यक्ष केपी शर्मा ओलीले खानेपानीमन्त्री पनि बनाएका थिए ।

उनी राजीनामा बुझाउने केही समयअघिबाटै निष्क्रिय बसेका थिए । एमालेले १४ महिनाअघि फरक भूगोलको जिम्मा दिँदा उनी बिदामा बसेका थिए । ०८० साउनमा बसेको सचिवालय बैठकले उनलाई सोधपुछ गर्ने निर्णय गरेको थियो । बिहीबारको सचिवालय बैठकले अरु नेताको कार्यविभाजन गर्दा उनलाई पदमुक्त गरिएको छ । उनको स्थानमा अर्का नेताले स्थायी कमिटी सदस्य बन्ने मौका पाएका छन् ।

अध्यक्ष ओलीसँगको मनमुटावका कारण थापा एमालेबाट बाहिरिएको चर्चा छ । तर, उनले फरक स्कुलिङका कारणमा एमालेमा बस्न नसकेको संकेत गरे । “स्कुलिङको कुरा हो । अरु खास केही विषय होइन । ओलीजीसँग मेरो त्यस्तो केही मनमुटाव होइन । मलाई माया नै गर्नुहुन्थ्यो,” उनले बाह्रखरीसँग भने, “विरासत र स्कुलिङले गर्दा मैले राजीनामा दिएको थिएँ ।”

थापाले आगामी योजना भने बनाइनसकेको सुनाए । “अहिले लेखपढमा नै व्यस्त छु । अब के गर्ने भन्ने योजना बनाइसकेको छैन,” उनले भने ।