काठमाडौँ । ऊर्जा, जलस्रोत तथा सिँचाइमन्त्री दीपक खड्कासँग विश्व बैंकका देशीय निर्देशक डेभिड सिसलेनबीच भेटवार्ता गरेका छन् । बिहीबार सिंहदरबारमा भएको भेटमा विश्व बैंकले नेपालको ऊर्जा र सिँचाइ क्षेत्रमा गरेको सहयोग र विविध विषयमा छलफल गरिएको थियो ।

त्यसक्रममा मन्त्री खड्काले नेपालको ऊर्जा क्षेत्रको विकासका निम्ति निजी क्षेत्र र दातृनिकायलाई साथमा लिएर सरकार अगाडि बढ्ने बताए । अन्तर्राष्ट्रियस्तरमा विद्युत् बिक्री गर्न आवश्यक पर्ने ट्रान्समिटर लाइन निर्माणमा विश्व बैंकको सहयोग आवश्यक रहेको उनले उल्लेख गरे ।

मन्त्री खड्काले आन्तरिक खाद्यान्न परिपूर्तिका निम्ति सिँचाइ क्षेत्रको विकास आवश्यक रहेको बताए । उक्त क्षेत्रमा समेत विश्व बैंकको सहयोग रहने उनले विश्वास व्यक्त गरे । विकास निर्माणका क्रममा हुने वातावरणीय प्रभावलाई रोक्न आवश्यक रहेको उनको भनाइ थियो ।

उनले सरकारले १० वर्षमा २८ हजार मेगावाट बिजुली उत्पादन गर्ने लक्ष्य लिएको जानकारी गराए । उक्त लक्ष्य हासिल गर्न विश्व बैंकको सहयोग आवश्यक हुने उनले बताए । विश्व बैंकको सहयोगमा बनाउन लागिएको अपर अरुण जलविद्युत् आयोजनाको काम चाँडै सम्पन्न हुने उनले विश्वास व्यक्त गरे ।

विश्व बैंकका देशीय निर्देशक सिसलेन नेपालको ऊर्जा र सिँचाइ क्षेत्रको विकासमा आफूहरूको सधैँ साथ र सहयोग रहने बताए । अपर अरुण जलविद्युत् आयोजनालाई चाँडो सकाउने गरी काम भइरहेको उनले उल्लेख गरे । ऊर्जासँगै सिँचाइको योजनालाई विश्व बैंकले प्राथमिकता दिने उनको भनाइ थियो ।