काठमाडौं । फ्रान्सका रक्षक रफाइल भराने कोमोमा अनुबन्धित भएका छन् । ३१ वर्षीय रक्षक भराने फ्रि एजेन्टको रूपमा कोमोमा अनुबन्धित भएका थिए । उनी हालै मात्र शीर्ष डिभिजन लिगमा उक्लिएका छन् । 

इंग्लिस क्लब म्यानचेस्टर युनाइटेडबीचको सम्झौता समाप्त भएपछि उनले दुई वर्ष कोमोबाट खेल्ने भएका हुन् । सन् २०१८ को विश्वकप, तीनपटकको ला लिगा र चारपटकको च्याम्पियन्स लिग विजेता भरानेले रियाल मड्रिड छोडेपछि तीन वर्ष युनाइटेडमा बिताएका हुन् । गत वर्ष अन्तर्राष्ट्रिय फुटबलबाट सन्न्यासको घोषणा गर्नुअघि भरानेले देशबाट ९३ क्याप जितेका छन् । 

२१ वर्षपछि इटालियन सिरी ‘ए’ मा उक्लिएको कोमोले आर्सनल तथा चेल्सीका पूर्वमिडफिल्डर सेस फेब्रिगासलाई मुख्य प्रशिक्षकमा नियुक्त गरेको छ । “म फेरि फेब्रिगासलाई भेट्ने छु, तर यसपटक विपक्षीको रूपमा होइन,” सम्झौतापछि भरानेले भने, “म निकै खुसी छु । म उनको खेल्ने सिद्धान्त र फुटबलप्रतिको लगावलाई साँच्चै मन पराउँछु ।”