काठमाडौं । १५ दिन बितिसक्दा पनि मुग्लिन–नारायणगढ सडकखण्डको सिमलतालमा पहिरोले बगाएको बस र यात्रुको अवस्था अज्ञात छ ।

काठमाडौंबाट गौरतर्फ जाँदै गरेको र वीरगन्जबाट काठमाडौंतिर आइरहेको दुई बस गएको असार २८ गते सिमलतालमा पहिरोमा परी त्रिशूली नदीमा खसेका थिए । दुई बसमा ६५ जना सवार थिए । तीमध्ये तीनजना जीवितै छन् । दुर्घटनामा परेका मध्ये हालसम्म २४ शव फेला परेकामा १९ जनाको मात्र सनाखत भएको छ ।

उक्त बस र यात्रुको खोजी गर्न भारतबाट राष्ट्रिय आपदा मोचन बलका १२ जनाको टोली आएको छ । बस खसेको १५ दिन बितिसक्दा पनि त्यसको कुनै अत्तोपत्तो लागेको छैन ।

सशस्त्र प्रहरी बल र भारतको टोलीले संयुक्त रूपमा बस र यात्रुको खोजी गरिरहेका छन् । भारतबाट आएको टोलीमा सोनार तीन र चारजना गोताखोर र प्राविधिक छन् । ६ दिनसम्म सोनारले खोजी गर्दा केही फेला परेन । त्यसपछि चुम्बकको प्रयोग गर्दा समेत बस फेला पर्न नसकेको विपद् व्यवस्थापन तालिम शिक्षालयका एसपी जनक पुरीले बताए ।

उक्त बसका ३८ यात्रु अझै हराइरहेका छन् । सात दिनलाई आएको भारतीय टोलीको समय शनिबारदेखि सकिएको छ । हिमालयन टेली भ्वाइस