काठमाडौं । राष्ट्रिय प्रजातन्त्र पार्टी (राप्रपा)का सांसद ज्ञानबहादुर (ज्ञानेन्द्र) शाहीले संसद्लाई ‘ब्ल्याकमेल’ गर्ने थलो नबनाउन चेतावनी दिएका छन् । मंगलबार प्रतिनिधिसभा बैठकको आकस्मिक समयमा उनले संसद्का ठूला दलहरू नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी (रास्वपा)लगायत दललाई चेतावनी दिएका हुन् ।

“भ्रष्टाचारका फाइल खोल्दा तपाईंका फाइल किन नखोलेको भन्दै पछिल्लोपटक संसद्‌मा दोहोरी चलेको छ । हामी भन्छौँ– नयाँ, पुराना जोसुकै हुन्, चोर चोर नै हुन्,” उनले भने ।

रास्वपालक्षित हुँदै उनले हिजो सरकारमा हुँदा केही गर्न नसक्नेले अहिले उफ्रिनुको कुनै औचित्य नहुने बताए । हिजो सरकारमा हुँदा भ्रष्टाचारीलाई कारबाही गरेको भए अहिले किन उफ्रिनुपर्थ्यो भन्ने उनले जिज्ञासा व्यक्त गरे ।

“ओम्नी, गिरिबन्धु, टेरामक्स भनेर कराउन नपरोस्, काम गर्नुहोस् । स्टन्टबाजी नगर्नुहोस्,” उनले भने ।