काठमाडौं । सत्तासाझेदार दल नेपाली कांग्रेसका सांसद सपना राजभण्डारीले त्रिभुवन अन्तर्राष्ट्रिय विमानस्थल मानव तस्करीको अखडा कहिलेसम्म भइरहने भन्दै प्रश्न गरेकी छन् । मंगलबार प्रतिनिधिसभा बैठकको शून्य समयमा उनले महिला बेच्ने गिरोहको कब्जाबाट विमानस्थल र अध्यागमन कहिलेसम्म मुक्त हुन्छ भन्दै प्रश्न गरिन् ।

“दुबईमा मात्र दैनिक २५० महिलाको तस्करी हुने र त्यहॉबाट अन्य देशमा बिक्री हुने गरेको मिडियामा समाचारहरू आएको छ । सबै खाडी राष्ट्रको जोड्दा यो संख्या ५०० नाघ्छ,” उनले भनिन्, “सेटिङबिना भिजिट भिसाका नाममा भइरहेको यो तस्करी सम्भव छ ?”

सांसद राजभण्डारीले वैदेशिक रोजगारीमा जान लागेका प्रत्येक नेपालीबाट दलालले मोटो रकम उठाएर मानव तस्करी गरिरहेको बताइन् । उनले थपिन्, “यो अमानवीय सेटिङमा सरकारका निकायहरू नै संलग्न रहेको पनि मिडियामा आएको छ । अध्यागमनबाट सेटिङमा भइरहेको यो तस्करी रोक्न सभामुखमार्फत माननीय गृहमन्त्रीज्यूको ध्यानाकर्षण गराउँछु ।”