![दुई ठूला दल मिलेर सरकार बनाएकाले सेयर बजारमा उत्साह : महत](https://12khari.top/uploads/posts/prakash-sharan-mahat1-1721653607.jpg)
काठमाडौं । पूर्वअर्थमन्त्री डा. प्रकाशशरण महतले दुई ठूला राजनीतिक दल (कांग्रेस–एमाले) मिलेर सरकार बनाएकाले सेयर बजारमा उत्साह देखिएको बताएका छन् । नयाँ बानेश्वरस्थित संघीय संसद् भवन परिसरमा सोमबार सञ्चारकर्मीसँग उनले यस्तो बताएका हुन् ।
मुख्य दुई राजनीतिक दल मिलेर सरकार बनाएकाले जनताको अपेक्षा ठूलो रहेको उनले उल्लेख गरे । उनले अब सेयर बजार मात्र नभएर समग्र अर्थतन्त्रमा उत्साह देखिनुपर्नेमा जोड दिए ।
मागभन्दा आपूर्ति बढी भएकाले पनि समस्या देखिएको उनले औँल्याए । समस्या समाधान गर्ने गरी नेपाल राष्ट्र बैंकले मौद्रिक नीति ल्याउन आवश्यक रहेको उनले बताए । अर्थतन्त्रमा सहजता सिर्जना गर्ने गरी मौद्रिक नीति ल्याउन उनले सुझाव दिए ।
पूर्वअर्थमन्त्री महतले सेयर बजार, जग्गा कारोबारलगायत क्षेत्रमा कर्जा प्रवाहका निम्ति सीमा कायम राखेर गरिएको ‘माइक्रोम्यानेजमेन्ट’लाई विचार गर्न आवश्यक रहेको बताए । उनले बैंकको ब्याजदरमा सहजता आएको भन्दै सेयर बजार र घरजग्गा कारोबारमा रहेका सीमा खुकुलो गरिनुपर्नेमा पनि जोड दिए ।
कर्जामा अनुत्पादक क्षेत्र भनेर लगाएको सीमामा पनि पुनर्विचार गर्न आवश्यक रहेको उनले बताए । न्युज एजेन्सी नेपाल