बेइजिङ । विश्वभरका माइक्रोसफ्टबाट चल्ने कम्प्युटर सिस्टममा गडबडी आए पनि चीनमा भने सबैथोक ठीकठाक चलेको थियो । शुक्रबार साइबर सुरक्षा फर्म क्राउडस्ट्राइकको एक अपडेटका कारण माइक्रोसफट सिस्टमबाट चल्ने सबै कम्प्युटरमा ब्लु स्क्रिन देखिएको थियो । 

यसले गर्दा विश्वको विभिन्न भागमा विमान सेवा तथा अन्य विजनेस सर्भिसमा समस्या आएको भए पनि चीनमा भने छिटपुटबाहेक कुनै समस्या नआएको जनाइएको छ । 

यसको कारण के होला ? चीनले के गरेको थियो र यो समस्याबाट जोगियो ? यसको जवाफ सहज छ । चीनमा क्राउडस्ट्राइकको सायद प्रयोग नै भएको थिएन । क्राउडस्ट्राइकको एक अपडेटमार्फत नै माइक्रोसफ्ट प्रणालीबाट चल्ने कम्प्युटरमा अचानक समस्या आएको थियो । 

चीनमा निकै कम बिजनेस वा सर्भिस समूह छन् जो कुनै अमेरिकी कम्पनीबाट सफ्टवेयर खरिद गर्न चाहन्छन् । किनकी अमेरिकी कम्पनी चीनलाई आफ्नो साइबर सेक्युरिटीको लागि खतरा मान्दछन् ।

चीन माइक्रोसफ्टमा निर्भर थिएन । चीनको बजारमा अलिबाबा, टेन्सेन्ट र ख्वावे जस्ता घरेलु कम्पनीको दबदबा छ र धेरैजसो क्लाउड सर्भिस यिनै कम्पनीको कब्जामा छन् । यसले गर्दा चीनमा आईटी बन्दको खबर त्यति ठूलो घबराहट ल्याउने खालको भएन । यसमा केवल विदेशी कम्पनी र संगठन नै प्रभावित थिए ।

यद्यपि, चीनको सोसल मिडिया साइटमा केही प्रयोगकर्ताले चीन सहरमा रहेका सेराटन, मेरियट र हायात जस्ता इन्टरनेसनल चेनका होटेलमा चेक इन नभएको गुनासो भने गरेका थिए । बीबीसी