काठमाडौं । ढल मिसिएको पानीमा पोलियोको परिवर्तित भाइरस (भ्याक्सिन डिराइभ्ड पोलियो भाइरस टाइप ३) देखिएपछि सरकारले काठमाडौं उपत्यकामा खोप अभियान सञ्चालन गर्दै छ । टुकुचा र वाग्मती मिसिएको खोलाको पानी परीक्षण गर्दा उक्त भाइरस देखिएको स्वास्थ्य सेवा विभागले जनाएको छ ।

• काठमाडौंको ढलमा भेटियो पोलियो गराउने भाइरस, खोप अभियान चलाइँदै

यही साउन ९ देखि १२ गतेसम्म काठमाडौं, ललितपुर र भक्तपुरमा पाँच वर्षमुनिका सबै बालबालिकाका निम्ति विषेश खोप अभियान सञ्चालन गरिँदै छ । नियमित दिइएको भए पनि यो अभियानमा आफ्ना बालबालिकालाई अनिवार्य रूपमा पोलियोविरुद्धको खोप लगाउन स्वास्थ्य तथा जनसंख्या मन्त्रालयले आग्रह गरेको छ ।

पोलियो कस्तो रोग हो ? 
यो पोलियो भाइरसबाट हुने संक्रामक रोग हो । पोलियो भाइरसबाट संक्रमण भएको व्यक्तिलाई सामान्य लक्षण – जस्तै, ज्वरो आउने, पखाला लाग्ने, जिउ दुख्ने, थकान महसुस हुने हुन्छ । यो रोग लागे गम्भीर किसिमका लक्षण – जस्तै, पक्षघात र मृत्यु समेत हुन सक्ने मन्त्रालयले जानकारी गराएको छ ।

मन्त्रालयका अनुसार, यो रोगको हालसम्म कुनै निश्चित उपचार छैन । यो रोगबाट सुरक्षित हुने सबैभन्दा उत्तम र प्रभावकारी उपाय पोलियोविरुद्धको खोप नै हो ।

पोलियो रोग कसरी सर्छ ?
पोलियो रोग दूषित खाना र पानीको माध्यममार्फत एकबाट अर्को व्यक्तिमा सर्छ । यो रोगबाट बच्न बालबालिकालाई राष्ट्रिय खोप तालिकाअनुसार पोलियोविरुद्धका नियमित खोप पूर्ण मात्रामा दिनुपर्छ । साथै, व्यक्तिगत सरसफाइ, शुद्धीकरण गरिएको पानी र स्वच्छ खानामा विशेष ध्यान दिन मन्त्रालयले आग्रह गरेको छ ।

पोलियो रोग कुन उमेरका मानिसलाई लाग्छ ?
पोलियो रोग जुनसुकै उमेरका मानिसलाई लाग्न सक्छ । तर, पाँच वर्षमुनिका बालबालिका बढी जोखिममा हुन्छन् । “अबको खोप अभियानमा पाँच वर्षमुनिका बालबालिकालाई थप खोपको मात्रा अनिवार्य रूपमा दिनुपर्दछ,” मन्त्रालयको सूचनामा उल्लेख छ ।