काठमाडौं । यो साता धितोपत्र दोस्रो बजारमा कारोबार गर्नेहरूका लागि उत्साहजन रह्यो । यो एक सातामा सेयर बजारका सूचकहरू सकारात्मक रहे । यो साता बजार एक दिन घट्यो भने चार कारोबार दिन बढ्यो ।

धितोपत्र दोस्रो बजार मापक नेप्से परिसूचक चार दिनमा २३६.८७ अंकले बढ्यो । तर, सोमबार बजार १७.१८ अंकले घट्दा यो साताको बजार समग्रमा २१९.६९ अंकले बढ्यो । यो साता कारोबार रकम गत साताको तुलनामा २४ अर्ब १६ करोड ५१ लाख रुपैयाँले बढेको छ ।

आइतबारदेखि बिहीबारसम्मको पाँच कारोबार दिनमा ५३ अर्ब नौ करोड ८६ लाख रुपैयाँको सेयर कारोबार भएको नेप्सेले जनाएको छ । गत साता २८ अर्ब ९३ करोड ३५ लाख रुपैयाँको सेयर कारोबार भएको थियो । साताको अन्तिम दिन बिहीबार मात्र १५ अर्ब ५४ करोड रुपैयाँको सेयर कारोबार भएको छ ।

कारोबार रकम बढेसँगै लगानीकर्ताको कुल सम्पत्ति (बजार पुँजीकरण) पनि तीन खर्ब ४९ अर्ब ७९ करोड ५२ लाख रुपैयाँले बढेको नेपाल स्टक एक्सचेन्ज (नेप्से)ले जनाएको छ ।

यो साताको अन्तिम कारोबार दिन कुल बजार पुँजीकरण ३८ खर्ब ४६ अर्ब ६९ करोड रुपैयाँ छ । गत साताको अन्तिम कारोबार दिन कुल बजारपुँजीकरण ३४ खर्ब ९६ अर्ब ९० करोड रुपैयाँ कायम थियो । बजार पुँजीकरणको बढाइ हेर्दा पनि सेयर लगानीकर्ताको सेयरमा लगानी बढेको देखिन्छ ।

यो सता सोमबार बजार १७.१८ अंकले घटेको छ । आइतबार बजार ५२.९७ अंकले बढेको थियो । सोमबार पछिका कारोबार दिनमा बजार लगातार तीन दिननै बढेर कारोबार भयो । मंगलबार बजार ७०.१८ अंकले बढ्यो भने बुधबार ५४.०४ र बिहीबार ५९.६८ अंकले बजार बढ्यो ।

गत साता पनि बजार एक दिन सोमबार मात्र घटेको थियो बाँकी चार कारोबार दिन बजार बढेको थियो । गत साता बजार ८४.९० अंकले बढेको थियो । चार कारोबार दिनमा बजार ८९.५० अंकले बढेको थियो । तर, सोमबार बजार ४.६२ अंकले घटेपछि सो साता बजारको बढोत्तरी ८४.५० अंकमा रोकियो ।

यो साता भने लगानीकर्ताले मनग्य कमाएका छन् । नयाँ सरकारको गठन र आगामी वर्षको मौद्रिक नीतिलाई देखाएकार बजारका खेलाडी सक्रिय हुन सक्ने जानकार बताउँछन् ।