काठमाडौं । अखिल नेपाल फुटबल संघ (एन्फा)ले राष्ट्रिय महिला लिगमा १० टिम सहभागी गराउने निर्णय गरेको छ । एन्फाको बुधबार बसेको केन्द्रीय कार्यसमितिको भर्चुअल बैठकले प्रतियोगितामा १० टिम सहभागी गराउने निर्णय गरेको हो । 

जसअनुसार लिगमा तीन विभागीय टोलीसँगै छनोटबाट आएका तीन क्लब, संकटा र वाग्मती युवा क्लबसहित चन्द्रपुर नगरपालिका र वालिङ नगरपालिकालाई पनि सहभागी गराउने निर्णय गरेको हो ।

सर्लाहीको वाग्मती युवा क्लब र रौतहटको चन्द्रपुर नगरपालिका यसअघि एन्फाले सञ्चालन गरेको राष्ट्रिय महिला लिग छनोटबाट बाहिरिएको मधेस प्रदेशकै टिम हुन् । तीन टिम छनोट हुने समीकरणसहित सुर्खेतमा भएको प्रतियोगितामा मधेस चौथो भएपछि राष्ट्रिय लिगमा छनोट हुन असफल भएको थियो । 

तर, एन्फाको बुधबार बसेको बैठकले भने छनोटबाट बाहिरिएको मधेस प्रदेशका दुई टिमलाई लिगमा सोझै सहभागी गराउने निर्णय गरेको छ । यस विषयमा एन्फाका प्रवक्ता सुरेश शाहले भने महिला लिगलाई लम्ब्याउन चार टिमलाई ल्याउने निर्णय भएको प्रस्टीकरण दिए ।

“महिला लिगलाई लामो बनाउन र महिला फुटबललाई चलायमान बनाउन टिम थपेका हौँ । यसैकारण रौतहटको चन्द्रपुर र वालिङ नगरपालिकासँगै वाग्मती युथ क्लब र संकटा क्लबलाई सहभागी गराउने निर्णय भएको हो,” प्रवक्ता शाहले बाह्रखरीसँग भने ।

गत वैशाख ७ गतेदेखि २१ गतेसम्म सुर्खेतमा भएको महिला लिगको छनोटमा सात प्रदेशका सात टिमले प्रतिस्पर्धा गरेका थिए । जसबाट शीर्ष तीन टिम राष्ट्रिय लिगमा छनोट हुने प्रवधान एन्फाको थियो । उक्त लिगमा चौथो स्थानमा सीमित बनेपछि मधेस प्रदेश राष्ट्रिय लिगमा छनोट हुन असफल भएको थियो ।