काठमाडौं । सुन तस्करीको धन्दामा लागेका काभ्रेका विकास योन्जन पक्राउ परेका छन् । तस्करीको सुन बरामद भएको करिब एक वर्षपछि काभ्रेको महाभारत गाउँपालिका–२ का योन्जन काठमाडौंको गौशलाबाट पक्राउ परेका हुन् ।

काभ्रेको खानीखोला गाउँपालिका–३ का २८ वर्षीय बाबुलाल दोङको साथबाट प्रहरीले ९६० ग्राम सुन फेला पारेको थियो । गएको भदौ २५ मा दुबई हुँदै हिमालयन एयरलाइन्सबाट काठमाडौं ओर्लिएका उनले सुनको लेदो बनाएर मलद्वारमा लुकाएर ल्याएका थिए । 

दोङ पक्राउपछि अनुसन्धानका क्रममा उनी भरिया मात्र भएको खुल्यो । त्यसपछि दोङले ल्याएको सुन ‘रिसिभ’ गर्ने समूहको खोजी प्रहरीले गर्‍यो ।

प्रहरीले सुन ‘रिसिभ’ गर्ने काभ्रेको रोसी गाउँपालिका–३, घट्टेखोलाका ३३ वर्षीय जगत लामा र काभ्रेकै महाभारत गाउँपालिका–३ का ३६ वर्षीय मिङमा दोर्जे स्यान्तानलाई समेत पक्राउ गरेको थियो ।

प्रहरीको अनुसन्धानले सुनका मालिक विकास भएको खुलायो । तर, उनी त्यतिबेलादेखि नै फरार थिए । त्यतिबेलाको प्रहरीको अनुुसन्धानले उनी राजनीतिक आडमा सुन तस्करी गर्ने गरेको देखाएको थियो । मंगलबार भने विशेष सूचनाको आधारमा उनी त्रिभुवन अन्तर्राष्ट्रिय विमानस्थलको गेटबाट पक्राउ परेको जिल्ला प्रहरी परिसरका एसपी नवराज अधिकारीले जानकारी दिए ।

त्यतिबेला अनुसन्धान गरेको प्रहरीले योन्जन समूहले दुबई हुँदै विभिन्न व्यक्तिमार्फत महिनाको २० देखि ३० किलो सुन तस्करी गर्ने गरेको दाबी गरेको थियो ।

कार छाडेर भागेका थिए विकास
दुबई हुँदै सुन ल्याएका बाबुलालसहितको टोलीलाई पक्राउ गरेको प्रहरी सुन तस्करीका मालिक विकासको खोजीमा थियो ।

प्रहरीले विकास चढेको वाग्मती प्रदेश ०१२७ च ९९६० नम्बरको क्रेटा गाडीलाई काठमाडौंको ढल्कुबाट पिछा गर्दै थियो । उनीसँगै अर्का आरोपी मिङमासमेत थिए । तर, मिङमालाई पक्राउ गर्न सफल प्रहरी विकासलाई भने पक्राउ गर्न सकेनन् । विकासले गाडीमै बोकेको रड प्रहरीमाथि प्रहार गर्न खोज्दै भाग्न सफल भए । 

विकासको आपराधिक यात्रा सुन तस्करी मात्र होइन । यसअघि मोटरसाइकल चोरी मुद्दामा मकवानपुरको भीमफेदी कारागार बसेर चार वर्षअघि मात्रै छुटेका थिए ।

जेलबाट छुटेलगत्तै आपराधिक गतिविधि तीव्र पारेका उनीनिकट बताउँछन् ।

कारबाट भएको थियो करोडौँको चेक बरामद 
त्यतिबेला विकासलाई पक्राउ गर्न नसके पनि उनी चढेको कारबाट प्रहरीले करोडौँको चेक समेत बरामद गरेको थियो । कारमा प्रहरीले काभ्रे क्षेत्र नम्बर–१ ‘ख’का प्रदेशसभा सदस्य तीर्थ लामाले दिएको ६ लाख रुपैयाँको चेकसमेत बरामद गरेको थियो ।