काठमाडौं । नवनियुक्त गृहमन्त्री रमेश लेखकले सरकारले राजनीतिक स्थिरतालाई प्राथमिकतामा राखेको बताएका छन् ।

सोमबार गृह मन्त्रालयमा पदबहालीका क्रममा लेखकले भ्रष्टाचार नियन्त्रण गरेर सुशासन कायम गर्नु र अर्थतन्त्रलाई उकास्ने काम पनि सरकारको प्राथमिकतामा रहेको बताए ।

उनले संघीय लोकतान्त्रिक गणतन्त्र र समावेशितालाई सुदृढ गर्न संविधानको समीक्षा गर्नु पनि सरकारको प्राथमिकता रहेको स्पष्ट पारे ।

"अहिले नेपाल सरकारको प्राथमिकता भनेको राजनीतिक स्थिरता, भ्रष्टाचार नियन्त्रण गरी सुशासन कायम गर्ने, अर्थतन्त्रमा जुन शिथिलता, संकुचन देखा परेको छ, अर्थतन्त्रलाई क्रियाशील, चलायमान गरेर अर्थतन्त्र उकास्ने । संविधानको समीक्षा गर्ने, मूल्याङ्कन गर्ने," उनले भने ।

गृहमन्त्री लेखकले गृहमन्त्रीको रूपमा आफूले गर्ने काम विधिको शासन, शान्ति व्यवस्था र अपराध नियन्त्रण गर्ने विषयमा केन्द्रित हुने बताए ।