काठमाडौं । कोपा अमेरिका–२०२४ फाइनलको ‘हाफटाइम ब्रेक’ २५ मिनेटको हुने भएको छ । फाइनलको हाफटाइममा चर्चित कोलम्बियन गायिका साकिराले सांगीतिक प्रस्तुत दिने भएपछि ब्रेक करिब २५ मिनेटसम्म लम्बिने दक्षिण अमेरिकी फुटबल महासंघ (कन्मेबोल)ले जनाएको छ ।

कन्मेबोलको यो निर्णयप्रति फाइनल पुगेको कोलम्बियाका प्रशिक्षक नेस्टोर लोरेन्जोले आलोचना गरेका छन् । कन्मेबोलको यो निर्णयबाट खेलाडीको फिटनेसमा समस्या देखिन सक्ने भन्दै लोरेन्जोले असन्तुष्टि जनाएका हुन् ।

“प्रस्तुतिका बारेमा – आशा छ, सबैले खुसियाली मनाउनेछन् । साकिरा उत्कृष्ट कलाकार हुन् । मैले आज थाहा पाएँ । मलाई लाग्छ, यो खेल अन्यजस्तै हुनुपर्छ, नियमानुसार १५ मिनेट हाफटाइम भएको,” उनले भने, “हामी १६औँ मिनेटमा मैदान जाँदा जरिवाना तिर्न लगाइन्छ । तर, अहिले यहाँ एक प्रस्तुति छ र हामी २० वा २५ मिनेट बाहिर रहनेछौँ । यसले खेलाडीलाई असर गर्नेछ । उनीहरू आरामको स्थितिमा आइपुग्नेछन् र रिकभरीको यो समयले हाम्रो ड्रेसिङ रुमलाई कति असर गर्नेछ भन्नेबारे हामी पूर्ण जानकार छौँ ।”

कोपा अमेरिको–२०२४ को फाइनलमा सोमबार साविक विजेता अर्जेन्टिना र कोलम्बियाबीच प्रतिस्पर्धा हुँदै छ । यो खेल नेपाली समयानुसार बिहान ५ः४५ बजे सुरु हुनेछ ।