काठमाडौं । निवर्तमान उपप्रधान एवं परराष्ट्रमन्त्री नारायणकाजी श्रेष्ठले आफूले परराष्ट्र मन्त्रालयनिकट रहेर काम गर्ने बताएका छन् । आइतबार अपराह्न मन्त्रालयमा आयोजित बिदाइ कार्यक्रममा उनले यस्तो बताएका हुन् ।

मुलुकको परराष्ट्र नीतिलाई सही ढंगले अघि बढाउन पनि उक्त मन्त्रालयको निकट रहेर काम गर्न आफू प्रतिबद्ध रहेको उनले उल्लेख गरे । उनले आफूले नयाँ बन्ने परराष्ट्रमन्त्रीलाई निकट रहेर साथ दिन चाहेको बताए । ‘भोलेन्टियर’का रूपमा परराष्ट्र मन्त्रालयका काम गर्न आफूले अब बन्ने मन्त्रीसमक्ष निवेदन हाल्न चाहेको उनको भनाइ थियो ।

उनले परराष्ट्र नीतिका पक्षमा आफूले सदैव सम्बन्धित पक्षसँग छलफल, संवाद र अन्तरक्रिया गर्ने बताए ।

निवर्तमान उपप्रधानमन्त्री श्रेष्ठले आफूले राष्ट्रिय हितलाई केन्द्रमा राखेर परराष्ट्र सम्बन्धलाई अघि बढाउन सक्दो पहल गरेको जिकिर गरे ।

निवर्तमान उपप्रधानमन्त्री नारायणकाजी श्रेष्ठको भनाइ पढ्नोस्–
परराष्ट्र मन्त्रालयसँग त म अन्तरंग निकट रहन्छु, ताकि परराष्ट्र मन्त्रालयले परराष्ट्र सम्बन्धलाई सही ढंगले अघि बढाओस् । परराष्ट्र नीतिलाई सही ढंगले अघि बढाओस् । कूटनीतिक अभ्यास सही ढंगले गरोस् । त्यसको निम्ति आफ्नो तर्फबाट तपाईंहरूसँग निकटमा रहेर छलफल गर्ने र समाधानका प्रयत्नहरू गर्ने । यसलाई उन्नतस्तरको संसारको अहिलेको आवश्यकतालाई मिट गर्न सक्ने परराष्ट्र मन्त्रालयको रूपमा विकसित गर्ने काममा म तपाईंहरूको साथमा रहनेछु । मैले त भनेको पनि थिएँ– अर्को मन्त्री जो आउनुहोला, एउटा निवेदन त मैले हाल्नुपर्लाजस्तो छ, मलाई भोलेन्टियर भए पनि, सल्लाहकार भए पनि बनाउनु न केही समयका लागि । पूरै समय त म दिन सक्दिनँ । मान्छे के–के गर्ने तपाईं गर्नुस्, सिस्टम स्थापित गरिदिन्छु भन्ने पनि हुन्छ । तर, केही कामहरू छ यो मन्त्रालयको, त्यसलाई पूरा गर्न मलाई तपाईंको भोलेन्टियर बनाउनु न भन्न मलाई मन लागिरहेको छ । त्यसरी भने पनि नभने पनि म यो कामहरूलाई पूरा गर्न दृढतापूर्वक राज्यको सबै पक्षहरूसँग छलफल, संवाद, अन्तरक्रियामा हुनेछु । त्यसको निम्ति मेरो सधैँ प्रयत्न रहनेछ । न्युज एजेन्सी नेपाल