काठमाडौं । युरोपियन प्रतिस्पर्धाका ६ खेलमध्ये सबैमा जित । यो ऐतिहासिक लयसहित फाइलन प्रवेश गरेको टिम हो, शाही स्पेन । स्पेनका निम्ति जर्मनीमा जारी युरो–२०२४ मा सम्झनयोग्य क्षण धेरै बनिसकेको छ । सेमिफाइनलमा जब्बर रक्षापंक्तिसाथ उभिएको फ्रान्सविरुद्धको जितले स्पेनीलाई अझ सन्तुष्टि दिएको छ । नदियोस् पनि किन, स्पेनले केही प्रमुख खेलाडीको उपस्थितिबिनै निकालेको जित थियो त्यो ।

फ्रान्सविरुद्ध स्पेन रक्षक ड्यानी कार्भाहाल, रोविन ले नोर्मान्डसँगै मिडफिल्डर पेड्रीविहीन थियो । घुँडाको गहिरो चोटका कारण पेड्री प्रतियोगिताबाटै बाहिरिइसकेका छन् ।

फ्रान्सविरुद्ध १० मिनेट बित्न नपाउँदै एक गोलले पछि परे पनि स्पेनी टिममा अत्यास देखिएन । स्पेनले चार मिनेटभित्र दुई गोल गर्दै खेललाई आफ्नो पक्षमा राख्यो । अनि, परिपक्व र धैर्यसहित स्पेनीले खेललाई नियन्त्रणमा राखे, जसरी उनीहरूले पछिल्लो केही हप्तादेखि गरिरहेका थिए ।

अब स्पेन युरोपियन च्याम्पियनको सफलता कोर्न एक खेल मात्र पछाडि छ । युरो–२०२४ को फाइनलमा आइतबार राति स्पेनले इंग्ल्यान्डसँग खेल्ने तय छ ।

स्पेनिस कप विजेता एथ्लेटिको विल्वाओमा २४ वर्षीय रक्षक ड्यानी भिभियनको प्रदर्शन उम्दा थियो । यसैकारण उनले गत वर्ष स्पेनिस टिमसम्मको ढोका खोले । युवा र तुलनात्मक रूपमा कम अनुभवी भिभियन स्पेनिस टिमको रक्षापंक्तिका चौथो विकल्पसहित जर्मनी पुगेका थिए ।

तर, मंगलबार कार्भाहाल र ले नोर्मान्ड दुवै बाहिर हुँदा ३८ वर्षीय जेसस नाभासको काँधमा स्पेनिस रक्षापंक्तिको जिम्मेवारी थियो । फ्रान्सको पहिलो गोलपछि किलियन एमबाप्पेलाई बाँधेर राखेका नाभासले दोस्रो हाफमा मैदान छोडे । त्यसपछि उनको स्थानमा मैदान प्रवेश गरेका भिभियनको काँधमा स्पेनिस रक्षापंक्तिको जिम्मेवारी आयो ।

नाभास स्पेनिस स्वर्णिम पुस्ताका अन्तिम खेलाडी हुन् । स्पेनको त्यो पुस्ताले सन् २०१० को विश्वकप र २००८ र २०१२ मा आयोजित युरोपियन च्याम्पियनसिपको उपाधि लगातार जितेको थियो । भिभियनमा त्यति अनुभवी खेलाडीको स्थान पूर्ति गर्नुपर्ने दबाब थियो । भिभियनले त्यो जिम्मेवारी बखुबी निभाए पनि । खेलको अन्तिम आधा घण्टा उनले स्पेनिस टिमबाट चट्टानी प्रदर्शन देखाए । सबै चुनौती जितेका उनको आत्मविश्वास रक्षापंक्तिमा भेट्रान खेलाडीको जस्तै थियो ।

साझा लक्ष्य
भिभियनले चार महत्त्वपूर्ण चुनौती जिते र ८३ प्रतिशत सटीक पास खेले । जसले फ्रान्सको आक्रमणलाई सफल बन्न दिएन । उनी टिमको एकता सबैभन्दा महत्त्वपूर्ण पक्ष भएको बताउँछन् ।

“अन्त्यमा हामी सबैले साझा लक्ष्यका निम्ति कार्य गरेका हौँ । सबैसँग आफ्नै व्यक्तित्व छ । त्यहाँ यस्ता पनि मान्छे थिए, जसले केही फरक कुरा पस्किए । यहाँ सबैलाई उसको केही जिम्मेवारी छ भन्ने थाहा छ,” बिहीबार आयोजित पत्रकार सम्मेलनमा भिभियनले भने, “हामी के हुनसक्छ भन्ने कुरालाई सकेसम्म वेबास्ता गर्ने प्रयास गरिरहेका थियौँ । जब हामीसँग समय हुन्छ, त्यस बेला हामी कल्पना र आराम गर्छौँ । सकारात्मक मस्तिष्कमा रहन खोज्छौँ ।”

स्पेनका प्रशिक्षक लुइस डे ला फुएन्टे पनि एथ्लेटिक विल्वाओकै पूर्वरक्षक हुन् । बास्क्यु क्षेत्रका सात खेलाडीमध्येका एक भिभियन प्रशिक्षकसँग व्यक्तिगत चिनजान हुनुलाई राम्रो मान्छन् ।

डे ला फुएन्टे सन् १९८४ मा विल्वाओले दोहोरो लिग कपको उपाधि जित्दा टिममा थिए । केही महिनाअघि त्यही विल्वाओले ४० वर्षको उपाधि खडेरी तोड्दै कोपा डेल रेको उपाधि जित्यो । त्यति बेला भिभियन, युनाई सिमोन र निको विलियम्स विल्वाओको प्रमुख खेलाडी बने । रोयटर्सबाट भावानुवाद