काठमाडौं । जर्मनीको डर्टमन्डमा हुने युरो–२०२४ को दोस्रो सेमिफाइनलमा नेदरल्यान्ड्सविरुद्ध मैदान उत्रिँदा इंग्ल्यान्ड लगातार दोस्रोपटक फाइनल पुग्ने लक्ष्यमा हुनेछ । 

क्वार्टरफाइनलमा स्वीट्जरल्यान्डविरुद्ध पेनाल्टी सुटआउटमा जित निकालेपछि इंग्लिस टिमले सेमिफाइनल यात्रा तय गरेको थियो । तर, प्रतियोगितामा स्वभाविक प्रदर्शन दिन नसकेको इंग्ल्यान्डलाई यो जित उत्साहभन्दा पनि राहत थियो । 

ग्यारेथ साउथगेटको टोली सहज प्रतिद्वन्दीविरुद्ध अपेक्षाविपरीत पनि लड्खडाउँदै साधारण प्रदर्शनसहित सेमिफाइनलमा आइपुगेको हो । “यस्ता खाले राष्ट्रिय प्रतियोगितामा ठूलो दबाब हुन्छ । हाम्रो टिम सुरुआतदेखि नै भारी दबाबमा छ । उनीहरूले धेरै राम्रो गरिरहेका छन्,” डच टिमविरुद्धको खेलअघि इंग्लिस प्रशिक्षक साउथगेटले भने, “अहिले हामी धेरै गोल गर्न सकिरहेका छैनौँ । तर, हामीले यस्ता तीन टिमसँग खेल्यौँ, जसले रक्षापंक्तिमा पाँच खेलाडी राख्ने गर्दछन् । निक्कै राम्रो संगठित रक्षापंक्ति बनाउँछन् ।” 

यता, नेदरल्यान्ड्स भने हारको संघारबाट माथि उठ्दै सेमिफाइनलसम्म आइपुगेको टिम हो । क्वार्टरफाइनलमा डच टिम टर्कीयाविरुद्ध हारसहित प्रतियोगिताबाट बाहिरिने समीकरणबाट २० मिनेटमात्र पर थियो । तर, २० मिनेटभित्र दुई गोल गरेपछि पुनरागमन जितसहित नेदरल्यान्ड्सले सेमिफाइनल यात्रा तय गरेको हो । 

क्वार्टरफाइनलमा संघर्षका बाबजुद नेदरल्यान्ड्सले प्रतियोगिताको पछिल्लो तीन खेलमा निर्धारित समयमै जित निकालेको छ । यसको तुलना इंग्ल्यान्डसँग गर्ने हो भने, साउथगेटको टिमले एक खेलमामात्र निर्धारित समयभित्र जित निकालेको छ । डच टिम आक्रमणमा पनि इंग्ल्यान्डभन्दा अघि छ । 

प्रतियोगितामा नेदरल्यान्ड्ले २० प्रहार गर्दा नौ गोल गरेको छ । यस वर्षको बालोन डी‘अर दाबेदार जुड बेलिङ्घम, ह्यारी केन र फिल फोडनजस्ता जब्बर आक्रमण भए पनि इंग्ल्यान्डले पाँच गोलमात्र गरेको छ । तर, २० वर्षपछि युरोपियन च्याम्पियनसिपको सेमिफाइनलमा प्रतिस्पर्धा गर्न लागेको नेदरल्यान्ड्सको प्रदर्शन अनपेक्षित छ ।

इंग्लिस टिमविरुद्ध डच टिम १९८८ पछि पहिलो प्रमुख उपाधिको जित्ने लक्ष्यलाई कायम राख्न केन्द्रित हुनेछन् । “हामीले सेमिफाइनलमा जितका लागि लड्न आवश्यक छ । दुई देशबीचको यो ऐतिहासिक खेल बुधबार राति उत्कृष्ट हुनेछ । इंग्ल्यान्डसँग राम्रा खेलाडी छन्, तर हामीसँग पनि सोही स्तरका खेलाडी छन्,” डच टिमका प्रशिक्षक रोनाल्ड कोमनले भने । 

इतिहास हेर्दा इंग्लिस टिमविरुद्ध डच टिम हाबी देखिन्छ । पछिल्लो पटक यूईएफए नेसन्स लिगको सेमिफाइनलमा यी दुई टिमबीच प्रतिस्पर्धा हुँदा नेदरल्यान्ड्सले ३–१ को जित निकालेको थियो । डच टिमविरुद्धको पछिल्लो नौ खेलमा इंग्ल्यान्डले एक पटकमात्र जितको अनुभव बटुलेको छ । यी नौ खेलमा नेदरल्यान्ड्सविरुद्ध सन् २०१८ मा भएको मैत्रीपूर्ण खेलमा इंग्ल्यान्ड १–० ले विजयी भएको थियो । ‘हेड टू हेड’ मा यी दुई टिमबीच हालसम्म २२ खेल भएका छन् । जसमा नेदरल्यान्ड्सले सात र इंग्ल्यान्ड ६ खेलमा जित निकालेको इतिहास छ । 

यी दुई टिमबीचको नौ खेल भने बराबरीमा समाप्त भएको थियो । फिफा वरीयतामा नेदरल्यान्ड्स सातौँ र इंग्ल्यान्ड पाँचौँ स्थानमा छन् । जर्मनीको डर्टमन्डमा हुने यो खेल नेपाली समयअनुसार राति १२ः४५ बजेदेखि सुरु हुनेछ ।