काठमाडौं । वर्षासँगै देशका केही नदीमा आज पानीको बहाव बढ्ने सम्भावना छ । विशेष गरी पूर्वी क्षेत्रका नदी तथा खोलाको जलसतह उल्लेख्य बढ्ने बाढी पूर्वानुमान महाशाखाले जनाएको छ ।

यस दिन सिन्धुली, झापा, मोरङ, सुनसरी, तेह्रथुम, धनकुटा, ताप्लेजुङ, पाँचथर, इलाम, भोजपुर, खोटाङ, उदयपुर, मकवानपुर, सप्तरी, सिरहा, धनुषा, महोत्तरी, सर्लाही र रौतहट भई बहने अधिकांश साना नदीमा बहाव बढ्ने अनुमान छ । केही साना नदीमा आकस्मिक बाढीको ‘मध्यम’ जोखिम रहने महाशाखाको अनुमान छ । उक्त क्षेत्रमा उच्च सावधानी अपनाउन महाशाखाले आग्रह गरेको छ ।

यस्तै, संखुवासभा, ओखलढुंगा, सिन्धुपाल्चोक, दोलखा, रामेछाप, बारा, पर्सा, काभ्रेपलाञ्चोक, ललितपुर, गोरखा, लमजुङ, कास्की, अर्घाखाँची, पर्वत, पाल्पा, चितवन, नवलपरासी (बर्दघाट सुस्ता पूर्व) नवलपरासी (बर्दघाट सुस्ता पश्चिम), रुपन्देही, रोल्पा, सल्यान, रुकुम पश्चिम, जाजरकोट, कालीकोट, अछाम, बाजुरा, बझाङ र दार्चुला भई बहने अधिकांश साना नदीको बहाव उल्लेख्य बढ्ने अनुमान छ ।

अबका तीन दिन कोसी, नारायणी, कर्णाली, महाकाली र यसका प्रमुख सहायक नदीहरूमा जलसतह उल्लेख्य बढ्दो हुनेछ । पश्चिम सेती, कन्काई, कमला, पूर्वी राप्ती नदीको जलसतह पनि उल्लेख्य बढ्दो हुने महाशाखाको अनुमान छ ।

यस्तै, भोलि र पर्सि वाग्मती र यसका प्रमुख सहायक तथा बबई र पश्चिम राप्ती नदीहरूमा जलसतह उल्लेख्य बढ्दो हुने महाशाखाको अनुमान छ ।