काठमाडौं । नेकपा (एमाले)का उपाध्यक्ष युवराज ज्ञवालीले कम्युनिस्टबीच एकता आवश्यक रहेको बताएका छन् । शनिबार काठमाडौंमा पुष्पलाल जन्मशताब्दी समारोहमा उनले यस्तो बताएका हुन् ।

कम्युनिस्ट एकता देशका निम्ति धेरै महत्त्वपूर्ण रहेको उनले उल्लेख गरे । कम्युनिस्टबीच एकता नभई देश समृद्ध बन्न नसक्ने उनले जिकिर गरे ।

उनले देशको राजनीति र विशेषताले यहाँका सबै दलहरू मिल्नुपर्ने देखाएको बताए । सबै कम्युनिस्ट राजनीतिक दलको उद्देश्य देशलाई अघि बढाउने भएकाले एक हुन आवश्यक रहेकामा उनले जोड दिए ।

नेपाली जनता, राजनीतिक पार्टी, कम्युनिस्ट एकताबद्ध भएर अघि बढे संसारको कुनै तागतले केही गर्न नसक्ने उनको भनाइ थियो ।

उक्त कार्यक्रममा युवराज ज्ञवालीको भनाइ पढ्नोस्–
यहाँहरूले जुन प्रस्ताव राख्नुभएको छ कम्युनिस्ट एकताको लागि, त्यो धेरै महत्त्वपूर्ण छ । कम्युनिस्टहरूको बीचमा एकता गर्नुपर्छ । एकताबद्ध नभईकन हुँदैन । कम्युनिस्ट मात्रै होइन, हामी कांग्रेससँग मिलेर नै यति ठूलो उपलब्धि  प्राप्त गर्न सकेका छौँ । हाम्रो देशको राजनीति र विशेषताले के भन्छ भने नेपालका राजनीतिक पार्टीहरू धेरैभन्दा धेरै मिलेरै काम गर्नुपर्छ । किनभने, हाम्रो देशको जुन भूराजनीतिक अवस्था छ, देशलाई अघि बढाउने सबैभन्दा पहिलो कुरा हो । नेपाली जनताको बीचको एकता, यो देशका राजनीतिक पार्टीहरूबीचको एकता, लोकतान्त्रिक पार्टीहरूबीचको एकता र देशमा सबैभन्दा महत्त्वपूर्ण कुरा कम्युनिस्टहरूबीचको एकता हो । कम्युनिस्टहरूको नेतृत्व सबैलाई युनिफाइड गर्ने र त्यसको नेतृत्व कम्युनिस्टले गर्नुपर्छ । आगामी दिनमा पनि आवश्यक छ । फुटेर होइन जुटेर । हामी मिल्न सके देश अघि बढ्न सक्छ । हामी मिल्न नसके यो देश बर्बाद हुन्छ । जतिसुकै ठूला चुनौती भए पनि हामी नेपाली जनता, राजनीतिक पार्टी, कम्युनिस्टहरू एकताबद्ध भएर जाने हो भने संसारका कुनै पनि तागतले केही गर्न सक्दैन । मूल कुरा हामी एकताबद्ध हुन्छौँ कि हुँदैनौँ भन्ने हो । न्युज एजेन्सी नेपाल