काठमाडौं । सत्तारूढ दल नेकपा (एमाले)का सांसद गोकुल बाँस्कोटाले किसानलाई रुवाएर सरकार हाँसेर बस्ने हो भन्दै प्रश्न गरेका छन् । बिहीबारको प्रतिनिधिसभा बैठकको विशेष समयमा बोल्दै उनले किसानले दूधको मूल्य किन नपाएको हो भन्दै प्रश्न गरे । 

उनले किसानले दूध बेचेर पाँच अर्बभन्दा बढी रकम नपाएको भन्दै सरकारको ध्यानाकर्षण गराए । “महिनौँदेखि भुक्तानी नदिएर किसान रुवाएर सरकार हाँसेर बस्ने हो ? जनताको सरकार हैन ? जनतालाई जवाफ दिनुपर्छ कि पर्दैन,” उनले भने । 

सांसद बाँस्कोटाले दुग्ध विकास स्ंस्थानले एक अर्ब ५५ करोड बढी भुक्तानी गर्न बाँकी रहेको र प्राइभेट सेक्टर नाफामा मात्र लिप्त हुँदा मारमा किसान परेको उल्लेख गरे । लम्पी स्कीन रोगका कारण खर्बौ क्षति भएको र किसानले बिमाको रकम नपाएकोमा आपत्ति जनाए । “अहिलेसम्म एउटै वडामा ६ करोड बढी रकम तिर्न बाँकी छ । यसमा सरकार, प्रधानमन्त्री, अर्थमन्त्री, कृषिमन्त्रीको कुरा के हो ?,” उनले भने । 

सरकार चलाउन मात्र होइन जनताको मुद्दामा पनि उत्तिकै चासो राख्न सरकारलाई उनले अनुरोध गरे । दुग्ध विकास संस्थाको क्षमता वृद्धि गर्न के कस्ता काम भए, दुग्ध उद्योग सञ्चालन गर्न के काम भए भन्दै प्रश्न गरे । “किसानहरूले के गर्ने ? फ्रान्समा जस्तो ट्रयाक्टर सडकमा राख्ने कि गाईवस्तु ल्याउने कि के गर्दा कुरा सुनिन्छ ?,” उनले भने, “किसानले भिख मागेको होइन पसिनाको मोल मागेको हो । यो समस्या जति समाधान हुँदैन सरकार त्यति अलोकप्रिय हुँदै जान्छ ।”