![मुद्रास्फीतिका आधारमा मौद्रिक नीति आउँछ : गभर्नर अधिकारी](https://12khari.top/uploads/posts/mahaprasad_Adhikari-1719308274.jpg)
काठमाडौं । नेपाल राष्ट्र बैंकका गभर्नर महाप्रसाद अधिकारीले मुद्रास्फीतिका आधारमा मौद्रिक नीति ल्याउने बताएका छन् ।
मंगलबार काठमाडौंमा नेपाल आर्थिक पत्रकार समाजले आयोजना गरेको कार्यक्रममा गभर्नर अधिकारीले मुद्रास्फीति माथि हुँदा मौद्रिक नीति टाइट हुनु स्वभाविक रहेको भन्दै मौद्रिक नीति लचिलो आउने अनुमान नगर्न सुझाव समेत दिए ।
उनले तथ्यांकको मूल्यांकन गर्दै मौद्रिक नीति ल्याउने तयारी भइरहेको जिकिर गरे । बजारबाट दिएको ऋणको समस्यालाई सरलीकृत गर्नका लागि राष्ट्र बैंकतर्फ बढी आशातित भएको देखिए पनि राष्ट्र बैंकका आफ्नै सीमितता रहेको उनको भनाइ छ ।
गभर्नर अधिकारीले विरोधका लागि विरोध नभई नीजि क्षेत्रका वास्तविक समस्या आए समाधान गर्न केन्द्रीय बैंक तयार रहेको धारणा राखे । बैंकमा ऋण लिँदा कमिसन लिने गरेको प्रश्न उठेको भन्दै यो ठूलो बैंकिङ अपराध भएकाले प्रमाणसहित ल्याउन आग्रह गरे । बिनाप्रमाणका आधारमा सार्वजनिक मञ्चमा आरोप लगाएर केही नहुने उनको भनाइ छ ।