काठमाडौं । सरकारले बकर इदको अवसरमा सोमबार सार्वजनिक बिदा दियो । तीन दिनअघिको मात्रै निर्णय भएकाले अस्पतालहरूले बिदा र सेवा तालिकाबारे तत्काल निर्णय गर्नुपरेको थियो ।   

सोमबार काठमाडौंका सबै सरकारी तथा शिक्षण अस्पतालले समेत सेवा रोकेनन् । अधिकांश अस्पतालहरूले बिहान ९ देखि १२ बजेसम्म बहिरंग (ओपीडी) सेवा प्रदान गरेका थिए । केही अस्पतालले भने एक्स्टेन्डेड हस्पिटल क्लिनिक (इएचएस)को माध्यमबाट पनि सेवा प्रवाह गरेका छन् । 

चिकित्सा विज्ञान राष्ट्रिय प्रतिष्ठान (न्याम्स) अन्तर्गतका वीर र राष्ट्रिय ट्रमा सेन्टर दुवै अस्पतालमा सोमबार बिहान ९ देखि १२ बजेसम्म ओपीडी सुचारु थियो । 

“सयम दिएका शल्यक्रिया र अरु सेवा पनि दिनभर नै सुचारु छन्,” ट्रमा सेन्टरका सूचना अधिकारी खुमबहादुर घर्तीले भने । ट्रमामा दैनिक ३५० जनाको कोटा तोकेर ओपीडी टिकट वितरण गर्ने गरिन्छ । सार्वजनिक बिदाका दिनमा २०० देखि २५० सम्मले यो सेवा लिने गरेका छन् । यसबाहेक इमर्जेन्सी, शल्यक्रिया र अन्य सेवाहरू पनि सुचारु नै रहने घर्तीले बताए । 

वीर अस्पतालको ओपीडीमा दैनिक दुई हजारदेखि दुई हजार ५०० सम्म बिरामी आउने गरेका छन् । बिदाको दिन यो संख्या झन्डै आधा हुन्छ । 

शुक्रराज ट्रपिकल तथा सरुवा रोग अस्पतालमा शनिबारबाहेक कुनै पनि सार्वजनिक बिदामा ओपीडी, खोप लगायतका सेवा रोक्ने गरिएको छैन । सार्वजनिक बिदाका दिनमा ओपीडी सेवा बिहान ९ देखि १२ बजेसम्म सञ्चालन हुन्छ । अस्पतालका इमर्जेन्सी इन्चार्ज भालेश्र यादवका अनुसार सो समयभन्दा पछि आउने बिरामीलाई अवस्था हेरेर इमर्जेन्सीमा नै राखी परीक्षण तथा उपचार गर्ने गरिएको छ । खोप सेवा समेत इमर्जेन्सीबाटै प्रवाह गरिन्छ । 

कान्ति बाल अस्पतालमा सोमबार टिकट काउन्टरका कर्मचारी र चिकित्सकहरूलाई बिदा दिइएको थिएन । अस्पतालमा आइपुग्ने बिरामीलाई ओपीडी खोलेर नै चिकित्सकहरूले सेवा दिइरहेको थिए । “क्यालेन्डरमा नभएका सार्वजनिक बिदामा ओपीडी सेवा रोक्ने गरेका छैनौँ, बरु शल्यक्रियाको डेट तोकिएको दिन बिदा पर्‍यो  भने अर्को दिन थप चाप हुन्छ”, अस्पताल निर्देशक डा. पंकज रायले भने । कान्तिको ओपीडीमा यो सिजनमा दैनिक एक हजारदेखि एक हजार २०० जनासम्म बिरामीको चाप हुने गरेको छ । 

यता त्रिवि शिक्षण अस्पताल (टिचिङ)ले सर्वाजनिक बिदामा कुनै पनि सेवा रोक्ने गरेको छैन । सोमबार समेत  टिचिङमा बिहान ९ देखि दिउँसो १ बजेसम्म ओपीडी सेवा सुचारु थियो ।

नियमित शल्यक्रिया, फलोअप लगायतका सेवालाई सार्वजनिक बिदाले प्रभाव नपार्ने अस्पतालका सूचना अधिकारी बाबुकृष्ण श्रेष्ठले बताए । “सिफ्टवाइज कर्मचारी तथा चिकित्सक÷स्वास्थ्यकर्मी खटिएका हुन्छन्, बिदाका दिनमा पनि सेवा अन्य दिनसरह नै चल्छ”, उनले भने । 

टिचिङले नियमितका अलवा दिउँसो १ बजेपछि इएचएस क्लिनिकबाट पनि ओपीडी सेवा दिने गरेको छ । श्रेष्ठका अनुसार टिचिङमा अहिले दैनिक दुई हजार २०० देखि दश हजार ८०० सम्म बिरामीले ओपीडी सेवा लिने गरेका छन् । 

यता परोपकार प्रसूति तथा स्त्रीरोग अस्पतालले पनि सार्वजनिक बिदाका दिन आधा दिन ओपीडी सेवा सञ्चालन गर्ने गरेको छ । बिहान ९ देखि १२ बजेसम्म ओपीडी र दिउँसो १ बजेदेखि इएचएसअन्तर्गत क्लिनिकबाट विशेषज्ञहरूले ओपीडी सेवा दिने गरेका छन् । 

पाटन स्वास्थ्य विज्ञान प्रतिष्ठानले पनि शनिबार र बुधबारबाहेक कुनै बिदामा अस्पतालको ओपीडी सेवा बन्द गर्ने गरेको छैन । दैनिक दुई हजार ६ सयदेखि तीन हजारसम्म बिरामी ओपीडीमा आउने पाटनमा आइतबार र बिहीबार अन्य दिनभन्दा केही भीड हुन्छ ।

यस्तै, दैनिक करिब एक हजारले ओपीडी सेवा लिने सिभिल सर्भिस अस्पताल र पाँच सयदेखि सात सयजनाले यो सेवा लिने सहिद गंगालाल राष्ट्रिय हृदय केन्द्रले पनि सार्वजनिक बिदाका दिन आंशिक रूपमा ओपीडी सेवा सुचारु गर्दै आएका छन् ।