काठमाडौं । नेपाली राष्ट्रिय महिला टिम फिफा वरीयतामा दुई स्थान माथि उक्लिएको छ ।

विश्व फुटबलको सर्वोच्च निकाय फिफाले शुक्रबार अद्यावधिक गरेको वरीयतामा नेपाली महिला टिम दुई स्थानमा सुधारसहित ९८औँ स्थानमा उक्लिएको छ ।

यसअघि नेपाली टिम वरीयताको १००औँ स्थानमा थियो । नेपाल दक्षिण एसियाली क्षेत्रमा भने दोस्र्रो स्थानमा छ । दक्षिण एसियामा नेपालभन्दा माथि रहेको भारत एक स्थान खस्किँदै ६७औँ स्थानमा छ । तेस्रो स्थानको बंगलादेश १४०औँ स्थानमा यथावत् छ । चौथो स्थानको श्रीलका १५७औँ, पाँचौँ  स्थानको पाकिस्तान १५८, छैटौँ स्थानको माल्दिभ्स १६१औँ र सातौँ स्थानको भुटान वरीयताको १७३औँ स्थानमा छन् ।

विश्व वरीयतामा भने स्पेन शीर्ष स्थानमा कायमै छ । वरीयताको दोस्रो स्थानमा फ्रान्स, तेस्रो स्थानमा इंग्ल्यान्ड, चौथो स्थानमा जर्मनी र पाँचौँ स्थानमा अमेरिका छन् । स्पेन सन् २०२२ को फिफा महिला विश्वकप च्याम्पियनसमेत हो ।