नयाँ दिल्ली । भारतका प्रधानमन्त्री नरेन्द्र मोदी र क्यानडाका प्रधानमन्त्री जस्टीन ट्रुडोबीच जी–७ सम्मेलनमा आमुनेसामुन्ने हुने भएको छ । दुई देशबीच केही महिनाअघिदेखि सम्बन्ध तनावपूर्ण रहँदै आएको छ । जी–७ बैठक जुन १३ देखि १५ सम्म इटालीमा हुँदै छ ।

भारत जी–७ को सदस्य नभए पनि पाँचौँपटक आमन्त्रित सदस्यको रूपमा बैठकमा सहभागी हुँदै छ । क्यानडा र भारतका प्रधानमन्त्रीबीच भेटघाट हुने सम्भावनाका बारेमा भारतीय अधिकारीहरूले क्यानडाले भारतको विरुद्धमा उग्रपन्थीको वकालत गर्ने राजनीतिक मान्यता दिएकोमा आफूहरूको आपत्ति रहेको जनाएका छन् ।

उनीहरूले जी–७ बैठकमा भारतले ग्लोबल साउथको मुद्दालाई जोड दिने बताएका छन् । साथै, रुस–युक्रेन युद्ध अन्त्यका सम्बन्धमा कुरा गर्ने र जी–७ का नेताबीच दुईपक्षीय कुराकानी पनि हुने जनाएका छन् । यस्तै, गाजा समस्या समाधानका सम्बन्धमा पनि कुराकानी हुने जनाइएको छ । 

मोदीले पहिलो दिन जी–७ को आउटरिच सेसनमा पनि भाग लिने जनाइएको छ । उनको जी–७ नेता र आमन्त्रित नेताहरूसँग पनि कुराकानी हुन सक्ने जनाइएको छ । भारतका विदेश सचिव विनय क्वात्राले बुधबार जनाएअनुसार मोदीको कुराकानी इटालीका प्रधानमन्त्री जार्जिया मेलोनीका साथ पनि हुनेछ । दुई देशबीचको वार्ताको एजेन्डाबारेमा कुराकानी भइरहेको जनाइएको छ । 

एक भारतीय मूलका क्यानडेली नागरिकको क्यानडामा नै हत्या भएको विषयलाई लिएर भारत र क्यानडाबीच लामो समयदेखि आरोप प्रत्यारोप चल्दै आइरहेको बेलामा दुई देशका प्रधानमन्त्री अहिले एउटै कार्यक्रममा सहभागी हुन लागेका हुन् । बीबीसी