site stats
बाह्रखरी :: Baahrakhari
खेल
Global Ime bankGlobal Ime bank
वेस्ट इन्डिजविरुद्ध ३९ रनमै समेटियो युगान्डा, एक ब्याटरबाट मात्रै दोहोरो अंकमा रन 

काठमाडौं । दुई पटकको च्याम्पियन वेस्ट इन्डिजले आईसीसी ट्वान्टी–२० विश्वकपमा लगातार दोस्रो जित निकाल्ने क्रममा अफ्रिकी प्रतिद्वन्दी युगान्डालाई ३९ रनमै समेटेको छ । 

आइतबार बिहान भएको समूह ‘सी’ को खेलमा वेस्ट इन्डिजले प्रस्तुत गरेको १७४ रनको लक्ष्य पछ्याउने क्रममा युगान्डा १२ ओभरमा ३९ रनमै समेटिएपछि वेस्ट इन्डिज १३४ रनले विजयी भएको हो । 

जारी विश्वकपमा कुनै पनि टिमले बनाएको यो नै अहिलेसम्मको सबैभन्दा सानो योगफल हो । युगान्डाका जुमा मियागीले १३ रन बनाउनुबाहेक अन्य कुनै पनि ब्याटर वेस्ट इन्डियन बलरसामु टिक्न सकेनन् । युगान्डाका तीन ब्याटर शून्यमा पभेलियन फर्किएका थिए । युगान्डालाई सस्तैमा रोक्न वेस्ट इन्डिजका अकेइल हुसैनले पाँच विकेट लिए । चार ओभर बलिङ गरेका हुसैनले ११ रनमात्र खर्चिए । उनको इकोनोमी रेट तीन पनि कटेन । अल्जारी जोसेफले दुई विकेट लिए । रोमारियो सेफर्ड, आन्द्रे रसेल र गुडाकेस मोतीको नाममा समान एक विकेट रह्यो । 

त्यसअघि टस जितेर ब्याटिङमा आएको वेस्ट इन्डिजले निर्धारित २० ओभरमा पाँच विकेट गुमाएर १७३ रनको योगफल खडा गरेको थियो । वेस्ट इन्डिजका जोन्सन चार्ल्सले सर्वाधिक ४४ रन बनाएका थिए । आन्द्रे रसेलले ३० र कप्तान रोभमन पावेलले २३ रन थप्दा निकोलस पुरन र सेरफन रुथरफोर्डले समान २२ रन जोडे । ब्रान्डन किंगले १३ रन बनाए । 

युगान्डाका ब्रियन मासाबाले दुई विकेट लिए । अल्पेस रामजानी, दीनेश नकर्णी र कोस्मोस क्युवुटाले समान एक विकेट हात पारे । 

जारी प्रतियोगितामा वेस्ट इन्डिजको यो लगातार दोस्रो जित हो । वेस्ट इन्डिजले यसअघि पहिलो खेलमा पपुवा न्यु गिनी (पीएनजी) विरुद्ध पाँच विकेटको जित निकालेको थियो । दुई खेलबाट चार अंक जोडेको वेस्ट इन्डिज तालिकाको दोस्रो स्थानमा छ । तीन खेल खेलिसकेको युगान्डाको भने यो दोस्रो हार हो । 

युगान्डाले यसअघि पहिलो खेलमा अफगानिस्तानविरुद्ध १२५ रनको हार बेहोर्दा दोस्रो खेलमा भने पीएनजीविरुद्ध तीन विकेटको जित निकालेको थियो । तीन खेलबाट दुई अंक जोडेको युगान्डा तालिकाको तेस्रो स्थानमा छ ।

प्रकाशित मिति: आइतबार, जेठ २७, २०८१  ०९:३१
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro