site stats
बाह्रखरी :: Baahrakhari
देश
Global Ime bankGlobal Ime bank
मनसुनजन्य विपत्तिको तयारी कस्तो छ ? गृहमन्त्री लामिछानेको सदनमा यस्तो जवाफ 

काठमाडौं । सरकारले मनसुनजन्य विपत्तिबाट तीन हजार घरपरिवार प्रत्यक्ष प्रभावित हुन सक्ने र एक हजार परिवारलाई उद्धार र राहत उपलब्ध गराउनुपर्ने आकलन गरेको छ । बुधबार प्रतिनिधिसभा बैठकमा उपप्रधान तथा गृहमन्त्री रवि लामिछानेले पछिल्ला अध्ययन र बैठकले त्यस्तो निष्कर्ष निकालेको जानकारी दिए ।

उनले विपद्‌बाट १८ लाख नागरिक र चार लाख १२ हजार घरधुरी प्रभावित हुनसक्ने अनुमानबारे पनि सदनमा चर्चा चलिरहेको सुनाए । मनसुन पूर्वतयारी तथा प्रतिकार्य राष्ट्रिय कार्ययोजना २०८१ लाई यही जेठ २२ मा कार्यकारी बैठकबाट पारित गरिएको र मन्त्रालय र विभागलाई निर्देशन दिने गरी तयारी भएको गृहमन्त्री लामिछानेको भनाइ छ । 

बैठकले जेठ १९ देखि असोज १९ गतेको समयलाई मनसुनको जोखिमको समय तोकेको पनि उनले बताए । गृहमन्त्री लामिछानेले गृह मन्त्रालयको विपद् तथा द्वन्द्व व्यवस्थापन महाशाखाका सहसचिवको नेतृत्वमा मनसुन पूर्वतयारी तथा प्रतिकार्य कमान्डपोष्टको स्थापना गर्ने निर्णय गरिएको जानकारी दिए । कमान्ड पोस्टले पूर्वतयारी र विपद्पछि समन्वयकारी भूमिका खेल्ने उनले बताए । 

मनसुनजन्य विपद्‌बाट १८ लाखभन्दा बढी मानिस प्रभावित हुने, सबैभन्दा बढी कोसी प्रदेशमा

उनले आजैबाट ११४९ नम्बरको टोल फ्री नम्बरमा टोली तैनाथ गरिएको जानकारी दिए । उनले राहतमा एकद्वार प्रणालीका रूपमा सहयोग आउने र एकै ठाउँमा जम्मा हुने विगतको समस्या यसपटक नरहने जानकारी दिए । 

“कुनै पनि सामग्री एकद्वारबाट व्यवस्थापन हुन्छ । एकद्वारबाट व्यवस्थापन हुनु भनेको एकै ठाउँमा थुप्रिनु होइन । एकै ठाउँबाट व्यवस्थापन गर्ने निकायले कहाँ आवश्यक परेको छ, त्यतै पठाइदिनेछ । जसबाट गोदाममा टन्नै सामान थन्किने, तर आवश्यक परिवारमा नपुग्ने विगतका समस्या यस वर्ष हल हुने अनुमान गरेको छु,” उनले भने ।  गृहमन्त्री लामिछानेले १० वटा सबैभन्दा बढी जोखिममा रहेको ठाउँको अध्ययन गरिएको बताए । ती ठाउँमा बाढीपहिरो आउँदा कहाँ सम्पर्क गर्ने, के–के कुरामा ध्यान पुर्‍याउने गरी नागरिकलाई सचेतना दिन पाँच पाँचजनाको टोली खटाइएको उनको भनाइ छ ।  

विपद्का बेलामा खटिने पत्रकार र स्वयंसेवकलाई पनि तालिम दिइने व्यवस्था मिलाइएको जानकारी दिए । उनले विपद् जोखिम न्यूनीकरणका निम्ति राजनीतिक दलको भूमिका रहने बताए । उनले राष्ट्रिय राजनीतिक दलका व्यवस्थापन विभाग वा समितिका प्रमुख र सदस्यहरू बैठक भोलि बिहीबार राखिएको जानकारी दिए ।
 

प्रकाशित मिति: बुधबार, जेठ २३, २०८१  १३:०८
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro