![गिरीबन्धुबारे योगेशको चुनौती– भ्रष्टाचारमा एमालेले अहिलेसम्म अख्तियार धाउनुपरेको छैन](https://12khari.top/uploads/posts/yogesh-bhattarai-samsad4-1717483868.jpg)
काठमाडौं । सत्तारूढ दल नेकपा (एमाले)का सचिव समेत रहेका सांसद योगेश भट्टराईले झापाको गिरीबन्धु जग्गा प्रकरणमा नेपाली कांग्रेसका महामन्त्री गगन थापालाई चुनौती दिएका छन् । थापाले गएको आइतबारको प्रतिनिधिसभा बैठकमा बोलेको विषयतर्फ लक्षित गर्दै भट्टराईले पार्टी र अध्यक्ष केपी शर्मा ओलीमाथि नियोजित ढंगले प्रचार र आरोप लगाउने षड्यन्त्र भएको बताए ।
मंगलबारको प्रतिनिधिसभा बैठकमा उनले ०४६ पछिको कुन काण्ड छानबिन गर्ने भन्दै कांग्रेसलाई प्रश्न गरे । “४६ सालपछि वा अगाडि कुन–कुन बेलाको छानबिन गर्नुपर्ने हो, प्रत्येक छानबिनको लागि एमाले तयार छ । एनसेलको गर्ने हो कि टेरामक्सको गर्ने हो कि ? बाँसबारीको गर्ने हो कि कोहलपुर जग्गाको गर्ने हो कि ? बालमन्दिरको गर्ने हो कि बालुवाटार जग्गाको कहाँ–कहाँ गर्ने ? सबैको छानबिनमा उभिन तयार छ एमाले,” भट्टराईले भने, “नेकपा (एमाले) त्यो पार्टी हो, भ्रष्टाचारीको आरोपमा अदालत र अख्तियारमा जानुपरेको छैन । पार्टीको केन्द्रीय समितिमा दायाँ–बायाँ दाग लागेको व्यक्ति राखेर बैठक गर्नुपरेको छैन ।”
उनले आफूहरू मार्क्सवादी भएको भन्दै नेपालमा बुद्धवादी रहेको बताए । “हामी मार्क्सवादी हौँ, नेपालमा बुद्धवादी हौँ । हामी कसैमाथि हात उठाउन चाहँदैनौँ, गलत ढंगले टिप्पणी गर्दैनौँ,” उनले भने, “जिउँदै मानिसलाई इँटाभट्टामा पोल्ने काम २०० वर्षपछि पनि गर्दैनौँ । हामी कुनै पनि अपराधमा चारतारे झन्डा ओढोस्, हँसियाहतौडाको झन्डा बोकोस्, घण्टी बजाओस्, हलो बोकोस्, त्यो कसैलाई पनि छुट छैन ।”
उनले सबै विषयमा छानबिन गर्न पनि चुनौती दिए । “प्रत्येक छानिबनका लागि आउँछौँ, यी तमाम विषयमा कांग्रेसकै साथीहरू बसेर छानबिन गरौँ,” भट्टराईले भने, “तपाईंहरू बसेर रिपोर्ट लिएर आउनुहोस् संसद्मा । सबैको सामना गर्न एमाले तयार छ ।”
गिरीबन्धु टी–इस्टेटको करिब ३४४ बिघा जग्गा सट्टापट्टा तथा बिक्रीको बाटो खुलाउने गरी मन्त्रिपरिषद्बाट निर्णय हुँदा ओली प्रधानमन्त्री थिए । उक्त निर्णयअघि नै जग्गा बैनाको विषय सार्वजनिक भएपछि ओलीमाथि भ्रष्टाचारको आरोप लगाइएको छ ।
आइतबारको बैठकमा कांग्रेस सांसद थापाले भ्रष्टाचारमा सत्तारूढ दलहरूको भूमिकाका कस्तो रहन्छ ? भन्दै प्रश्न गरेका थिए । उनले गिरीबन्धु भ्रष्टाचारमा रास्वपा बोल्छ कि बोल्दैन ? सहकरी ठगीमा एमाले बोल्छ कि बोल्दैन ? भन्दै प्रश्न गरेका थिए ।