काठमाडौं । स्ट्यान्डअप कमेडी शो ‘कमेडी च्याम्पियन सिजन–३’ ग्रान्ड फिनालेको नजिक पुगेको छ । अमरेन्द्र यादव, सुयशा खनाल, ऋषभ काफ्ले, वीरेन प्रधान, सन्देश सुवेदी र सुनील खड्का उत्कृष्ट ६ मा पुगेका छन् । उनीहरूले टप ५ का निम्ति आफ्नो प्रस्तुति पनि प्रस्तुत गरिसकेका छन् ।

यो राउन्डमा निर्णायकले दिएको विषयमा प्रतिस्पर्धीले कन्टेन तयार पारेर प्रस्तुति दिनुपर्ने थियो । जसअन्तर्गत अमरेन्द्रले मधेसको र्‍यापरको, सुयशाले लजालु मधेसी बुहारीको, ऋषभले मोर्डन एग्रिकल्चरको, वीरेनले पागल प्रेमीको, सन्देशले विदेश जान नचाहने युवा र सुनीलले सुपरस्टर नायकको विषयमा प्रस्तुति दिइसकेका छन् । यी ६ प्रतिस्पर्धीको यही प्रस्तुतिले टप ५ को यात्रा तय गर्नेछ । दर्शकले गर्ने भोट र निर्णायकले दिने खल्ती गोल्डेन भोटका आधारमा को बाहिरिने र अगाडि बढ्ने निर्धारण हुनेछ ।

आउँदो हप्ताको शृंखला क्वार्टरफाइनलको एपिसोड हुनेछ । त्यो मंगलबार (भोलि) छायांकन गरिनेछ । फाइनलमा तीनजनाले प्रतिस्पर्धा गर्नेछन् । ग्रान्ड फिनाले आउँदो असार १४ गते हुने निर्देशक विशाल भण्डारीले जानकारी दिए ।

उनका अनुसार, अहिलेसम्म शोमा रहेका ६ जनाको आ–आफ्नै विशेषता छ । अमरेन्द्रको वर्डप्ले गजबको छ । मधेसी टोनमा मधेसका विषय उनलाई चाख दिएर दर्शकले हेर्नु/सुन्नुको मुख्य कारण हो । सोही कारण उनको आजसम्मको यात्रा तय भएको निर्देशक भण्डारी बताउँछन् ।

सुयशाको डाइलग डेलिभरी र प्रिजेन्टेसन लोभलाग्दो छ । स्क्रिप्टमा लेखिएको एक अक्षर तलमाथि नगरी जस्ताको तस्तै प्रस्तुत गर्न सक्नु उनको अब्बल पक्ष भएको भण्डारीको भनाइ छ ।

ऋषभ स्टोरी टेलिङका लागि माहिर छन् । आफूले उठान गर्ने विषयको गहिराइमा पुगेर खोज्नु र अलि भिन्न तरिकाले पेस गर्न सक्नु उनको सबल पक्ष हो । सुरुसुरुका केही शृंखलामा देखिएको स्लो पेसलाई सच्याएर उनी अगाडि बढिसकेका छन् ।

वीरेन स्टेज पफर्मेन्समा अगाडि छन् । आफ्नो स्क्रिप्ट निर्धक्क प्रस्तुत गर्न सक्ने क्षमता वीरेनमा छ । उनी सामान्य विषयलाई पनि स्टेजमा पुगेपछि कन्भिन्स गर्ने गरी प्रस्तुत गर्न सक्ने क्षमता राख्ने निर्देशक भण्डारी बताउँछन् ।

टप ६ मध्येका अर्का प्रतिस्पर्धी हुन्, सन्देश सुवेदी । डार्क ह्युमरमा समकालीन प्रतिस्पर्धीभन्दा उनी निकै अगाडि छन् । उनले के भने भनेर बुझ्न केही समय लाग्ने तर चोटिलो प्रहार गर्न माहिर रहेका भण्डारी सुनाउँछन् ।

अर्का प्रतिस्पर्धी सुनील आमदर्शकको ध्यान खिच्ने कमेडी गर्ने र राइटिङमा पनि उत्तिकै अब्बल रहेको भण्डारीको भनाइ छ । सबैको आ–आफ्नै विशेषता छ । त्यसैले नै टप ६ सम्मको यात्रा सम्भव भएको हो ।

यो सिजनमा १२ वर्षीया सुयशाले दर्शकको ध्यान खिचिरहेकी छन् । सानो उमेरमै उनले आजसम्म दिएका प्रस्तुतिको तारिफ भइरहेको छ । ‘कमेडी च्याम्पियन’मा भाग लिँदा सुयशालाई टप ६ सम्म पुग्छु भन्ने लागेको थिएन । उनका बुवा सन्तोषले त झन सोचेका पनि थिएनन् । “सानो उमेरको बच्चा हो । कमेडी रियालिटी शोमा १२ वर्षको बच्चा आजसम्म कोही आएको थिएन । त्यसैले सानो उमेरको बच्चाको सहभागिताको इतिहास हुन्छ भन्ने लोभ मात्र थियो,” सन्तोष भन्छन् ।

सुयशा ललितपुरको एलए स्कुलमा कक्षा–७ मा पढ्छिन् । तर, टेलिभिजनको पर्दामा देखिने उनको लोभ अझ सानैदेखि थियो । “म पनि टेलिभिजनमा काम गर्थेँ । त्यसैले उनी चार वर्षको हुँदादेखि नै म अफिस हिँड्ने बेलामा तपाईंजस्तै म पनि टीभीमा देखिन्छु, मलाई लैजानु भन्थिन्,” सन्तोष भन्छन्, “टेलिभिजनमा देखिने उनको रहर थियो । त्यसैले दाइदिदीबाट केही सिक्छिन् भन्ने थियो । एकदुईवटा शृंखला त हो भनेर सहभागी भएका थियौँ ।”

प्रस्तुतिका निम्ति स्क्रिप्ट कम्तीमा ७०० देखि ८०० शब्दसम्मको हुन्छ । त्यो दुई दिनमा रिडिङदेखि रिहर्सलसम्म गरिसक्नुपर्छ । अरू प्रतिस्पर्धीजस्तै दुई दिनमै सुयशा पनि सबै तयारी सकाउँछिन् ।

१२ वर्षको उमेर भएकाले सुयशाले सिक्न र बुझ्न धेरै बाँकी छ । यसका लागि उनीसँग उमेर पनि छ । त्यसैले प्रोडक्सनले विषय दिएपछि सन्तोष छोरीका निम्ति आफैँ स्क्रिप्ट लेख्न बस्छन् । “मसँगै छोरी पनि स्क्रिप्ट लेख्न बस्छिन् । विषयबारे कतिपय कुरा आफैँ पनि खोज्छिन्,” उनी अगाडि थप्छन्, “मैले लेख्दा मेरो बुझाइ र एंगल हुने भएकाले छोरीलाई सुहाउँदैन भनेर उसको एंगलबाट लेख्छु । कति जोकमा उसकै एंगल र जोक्स पनि हुन्छ ।”

सानदैखि कमेडीप्रति रुचि भएकाले सुयशाले पनि कतिपय जोक लेख्ने गरेको उनी सुनाउँछन् । “जोकको फिनिसिङ म गर्छु । तर, उनी आफैँ पनि धेरै लेख्छिन्,” सन्तोष अगाडि थप्छन्, “धेरै त छोरी र म बसेर सल्लाह गरेर नै लेख्ने हो ।”