काठमाडौं । देशका विभिन्न सहरहरूमा विद्युत् कटौती हुने गरेकोमा सांसदहरूले आपत्ति जनाएका छन् । सोमबार प्रतिनिधिसभा बैठकको शून्य समयमा सांसदहरूले तराई मधेसमा चर्को गर्मीको सामना गरिरहेका जनतालाई थप कष्ट दिनेगरी विद्युत् आपूर्ति कटौती गरिएको भन्दै आक्रोश व्यक्त गरेका हुन् । 

सत्तारुढ नेकपा (एमाले)की सांसद दीपा शर्माले ४४/५४ डिग्रीको चर्को गर्मीको सामना गरिरहेको नेपालगञ्जमा अघोषित रूपमा विद्युत कटौती हुने गरेको भन्दै आपत्ति जनाइन् । उनले जनतालाई गर्मीबाट राहत दिन पनि विद्युत् आपूर्ति व्यवस्थालाई तत्काल सहज बनाउन सरकारसँग माग गरिन् । 

“नेपाल लोडसेडिङमुक्त देश भयो । तर, कुनै बेला दैनिक ६ घण्टा विद्युत् उपयोग गर्न पाएका देशभरका उपभोक्ता नागरिकहरू देश लोडसेडिङमुक्त भएसँगै उज्यालोमा रम्न पाए । तर, बिडम्बना बाँकेलगायत कर्णाली प्रदेशका जनताले भने लोडसेडिङमुक्त भएको अनुभूति गर्न पाएका छैनन् । नेपालगञ्ज उपमहानगरपालिकालगायत बाँके जिल्लाभरि नै विद्युत् आपूर्ति अनियमित भएका कारण ४४/४५ डिग्रीको तापक्रममा बाँकेवासीको जनजीवन असामान्य र कठिन बनेको छ । घोषित होइन, अघोषित लोडसेडिङका कारण अस्पताल, उद्योगधन्दा विद्यालय, सञ्चारका सबै माध्यमहरू र सबै कार्यालयहरूलाई काम गर्न कठिन भएको छ । यथाशीघ्र यो असामान्य र कठिन अवस्थालाई सामान्य र सहज बनाउन विद्युत् आपूर्ति नियमित र पर्याप्त उपलब्ध गराउन र त्यसको व्यवस्थापन गरी विद्युत् कटौती नगर्न दीर्घकालीन समस्या समाधान गर्न म सरकारसँग ध्यानाकर्षण गराउन चाहन्छु,” सांसद शर्माले भनिन् ।

प्रमुख प्रतिपक्ष दल नेपाली कांग्रेसका सांसद तेजुलाल चौधरीले पनि जनतामा थप मारमा पार्नेगरी विद्युत् कटौती नगर्न सरकारलाई आग्रह गरे । उनले गर्मीले जनताको जीवन कष्टकर बन्दै गएकाले सरकारले विद्युत् आपूर्ति सहज बनाउन तत्काल ध्यान दिनुपर्ने आवश्यकता औंल्याए । 

“नेपाल विद्युत् प्राधिकरणले व्यापक रूपमा विद्युत कटौती गरी राखेको छ । त्यसकारण तराई मधेसमा व्यापक रूपमा गर्मीको महसुस र जीवन कष्टकर बन्दै गएको छ । यस्तो अवस्थामा विद्युत् कटौती नगरीदिन म सरकारसँग जोडदार माग गर्न चाहन्छु । साथै चुरे दोहन व्यापक रूपमा भएको छ । यसको नियन्त्रण हुनुपर्‍यो,” उनले भने ।