![संयुक्त सरकार सञ्चालनको विधिअनुसार बजेट ल्याइएन : दाहाल](https://12khari.top/uploads/posts/rastriya-sava4-1717324818.jpg)
काठमाडौं । राष्ट्रियसभा सदस्य देवेन्द्र दाहालले संयुक्त सरकार सञ्चालनको विधिअनुसार बजेट निर्माण नगरिएको बताएका छन् । आइतबार राष्ट्रियसभा बैठकमा उनले यस्तो बताएका हुन् ।
नीति तथा कार्यक्रम र बजेट तयार गर्दा सरकारमा सामेल राजनीतिक दलका नेताहरूसँग छलफल गरिनुपर्ने भए पनि त्यो हुन नसकेको उनले उल्लेख गरे । उनले नीति तथा कार्यक्रमको आधार बजेटमा छ कि छैन ? भन्दै प्रश्न समेत गरे ।
संयुक्त सरकार बनाउँदाका न्यूनतम नीति वा प्राथमिकताका साझा संकल्पमा टेकेर बजेट ल्याइएको छ कि छैन ? भन्ने उनको थप प्रश्न थियो । उनले शिथिल भएको अर्थतन्त्रलाई माथि उठाउने गरी बजेट ल्याउन आवश्यक रहेकामा जोड दिए ।
“...नीति तथा कार्यक्रमको आधार बजेटमा छ कि छैन ? यो बजेट संयुक्त सरकार बन्दा न्यूनतम नीति वा प्राथमिकताका साझा संकल्प, त्यसले जे संकल्प बोकेको थियो वा त्यसलाई हेरेर ल्याउनुपर्ने, त्यो हेरेर ल्याएको छ कि छैन ? यसले प्राथमिकता पाएको छ कि छैन ?,” उनले प्रश्न गरे ।
उनले थप प्रश्न गरे, “१६औँ पञ्चवर्षीय योजनाका लक्ष्य हासिल गर्न ध्यान दिइएको छ कि छैन ? शिथिल भएको अर्थतन्त्रलाई माथि उठाउने गरी नीति तथा कार्यक्रम आउनुपर्ने हो ।”
उनले ‘समृद्ध नेपाल, सुखी नेपाल’को नाराका आधारमा बजेट ल्याइएको भन्दै सही विषय समावेश गरिएको पनि बताए । कृषि क्षेत्रको रूपान्तरणको विषय पहिलो प्राथमिकता पर्नु राम्रो भएको उनले उल्लेख गरे । न्युज एजेन्सी नेपाल