काठमाडौं । नेकपा (एकीकृत समाजवादी)का सम्मानित नेता झलनाथ खनालले पार्टीको महाधिवेशनबाट सहमतिमै नेतृत्व चयन हुने विश्वास व्यक्त गरेका छन् । आइतबार काठमाडौंमा पत्रकार सम्मेलन गरी उनले यस्तो बताएका हुन् ।

महाधिवेशनबाट दस्ताबेज पारित गरिनुका साथै सकेसम्म सहमतिमै नेतृत्व चयन गरिने उनले उल्लेख गरे । त्यसलाई रूपान्तरणकारी महाधिवेशनका रूपमा अघि बढाइने उनको भनाइ छ ।

“...महाधिवेशनले दस्ताबेजहरू पास गर्नुका साथै सकेसम्म अन्तिम प्रयत्न गरेर सहमतिपूर्ण नेतृत्व निर्माण गर्छौँ । त्यो सहमतिपूर्ण नेतृत्व निर्माणका लागि हामी छलफल गर्दै छौँ, गर्छौँ र अन्तिमसम्म गर्नेछौँ,” उनले भने, “यो महाधिवेशन रूपान्तरणकारी महाधिवेशनका रूपमा अघि बढाउनेछौँ ।”

उनले अहिले देशमा महँगी, भ्रष्टाचार र युवा विदेश पलायनको विकराल अवस्था रहेको बताए । पुँजीवादी, सामाजिक, आर्थिक व्यवस्थालाई समाजवादी, सामाजिक, आर्थिक व्यवस्थामा रूपान्तरण गर्ने विन्दुसम्मको कार्यक्रम महाधिवेशनबाट पारित गरिने उनले जानकारी दिए ।

सम्मानित नेता खनालले महाधिवेशनले कम्युनिस्ट आन्दोलनलाई थप उचाइमा पुर्‍याउने जिकिर गरे । न्युज एजेन्सी नेपाल