काठमाडौं । सत्तासझेदार दल राष्ट्रिय स्वतन्त्र पार्टी (रास्वपा)का सांसद गणेश पराजुलीले सरकारका अन्तर निकायबीच समन्वय नहुँदा बेथितिले सीमा नाघेको बताएका छन् । आइतबार प्रतिनिधिसभाको शून्य समयमा सांसद पराजुलीले सरकारका सम्बन्धित निकायबीच समन्वय नहुँदा ठूला दुर्घटना हुने र धेरै नागरिकले ज्यान गुमाउने अवस्था रहेको बताए ।

उनले कालोपत्रे र ढलान गरिएका सडकका बीचमा विद्युत् र टेलिकमका खम्बाले बाटो अवरोध हुँदा राजधानीबासीले सास्ती खेपिरहेको पनि बताए ।

“लाजमर्दो विषय त मेरो निर्वाचन क्षेत्रको ढुंगेधारास्थित ११ हजार भोल्टको मेन लाइनको खम्बा मोनोपोल राखेर व्यवस्थित नगर्दा सर्भिस ट्रयाक बन्न नसकेको के कुरा गर्नु ? त्यो भन्दा पनि डरलाग्दो अवस्था त्रिशूली–काठमाडौं ६६ हजार भोल्टको प्रसारण लाइनको तार वनस्थली सबस्टेसन खण्डमा झोलिएर नागरिकका घर टहरामा छुनु र केही घटनामा जनताले ज्यान गुमाउनु सामान्यजस्तो भइसक्यो । लाग्छ, सम्बन्धित निकाय निकै ठूलो दुर्घटना र धेरै नागरिकले ज्यान गुमाएको अवस्था हेर्नका लागि प्रतीक्षा गरिरहेको छ‚” उनले भने । 

उनले चक्रपथ विस्तारको काम अवरुद्ध भएको विषयमा पनि प्रश्न उठाए । “छिमेकी राष्ट्र चीनको सहयोगमा विस्तार गरिने भनेको चक्रपथको दोस्रो खण्ड लथालिङ्ग र अस्तव्यस्त बनाएर छोडेको विषय म यस सम्मानित सदनमा बारम्बार उठाएर सदनको महत्त्वपूर्ण समय बर्बाद गर्न चाहन्न । तर दुई छिमेकी राष्ट्रबीचको सुमधुर सम्बन्धमाथि इर्स्या गर्ने खराब तत्त्वले पो कतै भूमिका खेलेको हो कि ? वा सरकार स्वयंले छिमेकी राष्ट्रसँग अर्थपूर्ण संवाद गर्नमा चुकेको हो ? जनतामा यो संशय पैदा भएको विषयको ध्यानाकर्षण गराउन चाहन्छु ।”