काठमाडौं । चालु आर्थिक वर्षको अन्त्यसम्ममा तीन प्रदेशको आर्थिक वृद्धिदर राष्ट्रिय औसत वृद्धिभन्दा माथि हुने अनुमान गरिएको छ । अर्थमन्त्री वर्षमान पुनले आइतबार प्रतिनिधिसभा बैठकमा आर्थिक सर्वेक्षण २०८०/८१ को संक्षिप्त विवरण प्रस्तुत गर्दै यस्तो बताएका हुन् ।

चालु आर्थिक वर्षमा मुलुकको अर्थतन्त्र ३.९ प्रतिशतले वृद्धि हुने मन्त्री पुनले बताए । तर, प्रदेशगत रूपमा गण्डकी, वाग्मती र लुम्बिनी प्रदेशको आर्थिक वृद्धिदर राष्ट्रिय औसत वृद्धिभन्दा माथि रहने अनुमान गरिएको उनले बताए ।

फागुनसम्म कुल लगानी २.८ प्रतिशतले बढेर १७ खर्ब ४१ अर्ब ४८ करोड रुपैयाँ पुग्ने अनुमान गरिएको उनको भनाइ छ ।

यस्तै, चालु आर्थिक वर्षमा प्रतिव्यक्ति आय एक हजार ४५६ अमेरिकी डलर पुग्ने अनुमान गरिएको पनि उनले उल्लेख गरे ।

राजस्व परिचालनमा क्रमशः सुधार हुँदै गएको उनको भनाइ छ । फागुनसम्म संघीय सरकारको खर्च २.९ प्रतिशतले वृद्धि भएर आठ खर्ब एक अर्ब ५८ करोड रुपैयाँ पुगेको पनि उनले बताए ।