हङकङ । चार वर्षअघि कोभिड–१९ को रिपोर्टिङ गरेबापत पक्राउ परेकी चिनियाँ ब्लगर तथा पत्रकार झाङ झान रिहा भएको रिपोर्टर्स विदाउट बोर्डर्सले जनाएको छ ।

उक्त संगठनले झानको भिडियो सेयर गरेको छ । उनी गत हप्ता नै रिहा हुनुपर्नेमा कुनै जानकारी प्राप्त नभएका कारण समर्थक र साथीहरूले आशंका व्यक्त गरेका थिए । उनलाई रिहा गरेपछि मे १३ का दिन दाजुको घरमा जान अनुमति दिइएको थियो ।

उनी वुहानमा फैलिएको कोरोनाको रिपोर्टिङ गर्दा पक्राउ परेकी थिइन् । उनलाई रिपोर्टमार्फत झगडा गराएको र समस्यालाई बढाइचढाइ गरेको आरोपमा अदालतको आदेशानुसार सन् २०२० मेमा चार वर्षका निम्ति जेल पठाइएको थियो ।

४० वर्षीया ती महिला पत्रकार तथा पूर्ववकिलले विगतमा जेलभित्रै पटक–पटक भोक हड्ताल गरेका कारण अधिकारकर्मीले उनको स्वास्थ्य अवस्थाका बारेमा चासो दिँदै आएका थिए । बीबीसीबाट ।