काठमाडौं । चलचित्र ‘गाउँ आएको बाटो’ सामुदायिक लगानीमा बनेको पहिलो नेपाली सिनेमा हो । राई समुदायको कथामा बनेको यो चलचित्रमा राई समुदायका व्यक्तिहरूको लगानी रहेको छ । 

देश तथा विदेशमा बस्ने राई समुदायले यो चलचित्रमा लगानी गरेका छन् । चलचित्रको क्रेडिट लाइनमा निर्माताको नाम आमोद राई र नवीन सुब्बा रहे पनि अन्य लगानीकर्ता पनि छन् । नेपालमा सामुदायिक लगानीमा पहिलोपटक चलचित्र बने पनि विश्वका धेरै देशका लागि भने यो नयाँ ‘कन्सेप्ट’ होइन । 

“हाम्रोमा यो कन्सेप्ट नयाँ भए पनि विश्वका धेरै देशमा भने यही कन्सेप्टमा चलचित्र बनिसकेका रहेछन् । विशेषगरी आदिवासीहरूले आफ्नो समुदाय र संस्कृतिको विकास र प्रवर्द्धनका लागि यसरी चलचित्र बन्दारहेछन्,” निर्माता आमोद राई बाह्रखरीसँग भन्छन्, “हामीलाई निर्देशक नवीन सुब्बाले यो कन्सेप्टमा अभ्यास गरौँ भन्नुभयो र हामीले सामुदायिक लगानीमा सिनेमा बनायौँ ।” 

पहिलोपटक यस्तो अभ्यास गरेकाले सुरुका दिनमा केही चुनौती भए पनि पछि विस्तारै सहज हुँदै गएको उनी बताउँछन् । “पहिलोपटक अभ्यास भएकाले हामीले यसलाई अझै संरचनागत विकास गर्न बाँकी नै छ । यो लगानी मात्रै नभएर यस्ता चलचित्रले समुदायलाई कसरी फाइदा गर्छ भनेर बुझाउन पनि आवश्यक छ,” उनले भने । 

अमेरिकाबाट ८, हङकङबाट ६, नेपालबाट ७ जनाको लगानी रहेको उदाहरण दिँदै उनी भन्छन्, “राई समुदाय रहेको हरेक देशबाट ७/८ जनाको समूह बनाएर लगानी भएको छ । यसमा कति अनबोर्ड आउनु भएको छ भने कति आउनु भएको छैन ।” प्रतिव्यक्ति न्यूनतम दुई लाख रुपैयाँदेखि अधिकतम १५ लाखसम्म उठाएर चलचित्र गाउँ आएको बाटो बनेको हो । चलचित्रमा ३५ जनाको लगानी रहेको उनले जानकारी दिए । निर्माता आमोदका अनुसार चलचित्रको बजेट तीन करोड रुपैयाँ रहेको छ । 

जुन देशबाट लगानी भएको छ, त्यही देशमा सिनेमा स्क्रिनिङबाट उठेको पैसाबाट त्यहाँका लगानीकर्ताले मुनाफा लिने निर्माता राईले जानकारी दिए । “अन्य देशमा राम्रो चल्यो तर आफूले लगानी गरेको देशमा सिनेमा चलेन भने त्यहाँका लगानीकर्ता घाटामा जान सक्छन्,” आमोद भन्छन्, “ओटीटी र इन्टरनेसनल सेलबाट आएको रकम भने विश्वभरका लगानीकर्ताले आफ्नो लगानीको अनुपातमा पैसा पाउनेछन् ।” 

जेठ २५ गतेबाट रिलिज हुने चलचित्रमा दयाहाङ राई, पशुपति राई र प्रशन राई मुख्य भूमिकामा छन् ।