काठमाडौं । प्रमुख सत्तासाझेदार दल नेकपा (एमाले)का प्रमुख सचेतक महेश बर्तौलाले प्रमुख प्रतिपक्ष दल नेपाली कांग्रेसले संसदीय छानबिन समिति माग नगरी सरकार माग गरेको आरोप लगाएका छन् । सोमबार प्रतिनिधिसभा बैठकपछि सञ्चारकर्मीसँग कुरा गर्दै प्रमुख सचेतक बर्तौलाले कांग्रेसले संसदीय छानबिन समितिको नाम गरेर सरकारको माग गरेको बताएका हुन् । 

गृहमन्त्री रवि लामिछानेको नाममा छानबिन समिति बनाएर राजीनामा माग्ने र सरकार ढाल्ने बदनियत कांग्रेसले राखेको भन्दै उनले कांग्रेसको माग बदनियतपूर्ण र पूर्वाग्रहप्रेरित रहेको आरोप लगाए । कोही व्यक्तिको नाममा अनुसन्धान गर्न समिति बनाउन नसकिने उनको भनाइ छ । 

“यस्तो बदनियत राखेर एउटा कोही अमूक व्यक्तिका नाममा अनुसन्धान गर्नका लागि अनुसन्धान अधिकारी कांग्रेसले नियुक्त गर्न पाउँदैन । कांग्रेसको यसप्रकारको दादागिरी, उदण्डता, अराजकता, अधिनायकवादी तरिका स्वीकार्य हुन सक्दैन । यदि कांग्रेस संवादको माध्यमबाट अगाडि बढ्न तयार छ भने हामी संवादको सबै वातावरण बनाएर अगाडि जान तयार छौँ । कार्यदलको बैठक बस्न सक्छ । कार्यदललाई व्यवस्थित ढंगले लैजान चहान्छौँ । सहकारीपीडितलाई न्यायको प्रक्रियाबाट अगाडि जान चाहन्छौँ । बचतकर्ताहरूको बचतको सुरक्षाको सुनिश्चितता गर्न चहान्छौँ,” उनले भने, “ठगी र बदमासी गर्नेहरूलाई कारबाही गर्न चाहन्छौँ । त्यो यो संसदीय छानबिन समितिले गर्न सक्छ । तर, कांग्रेस तयार छ ? तपाईंहरूलाई चाहिएको छ रवि लामिछानेको नाम । नाम लिने, भोलिपल्टदेखि सदनमा राजीनामा माग्ने । सरकारलाई ढाल्ने । अस्थिरतातर्फ मुलुकलाई लैजाने दाउपेच कांग्रेसको छ । कांग्रेसले समिति माग गरेको होइन । समितिको नामबाट सरकार माग गरेको हो । जुन कुरा असम्भव छ । नेपाली कांग्रेसको त्यो बदनियत हो भन्नेकुरा, पूर्वाग्रहप्रेरित छ भन्ने कुरा, उसको समग्र चरित्र र व्यवहारबाट उदांगो भएको छ ।”

उनले संसदीय छानबिन समितिको कार्यादेश टुंग्याउन प्रमुख प्रतिपक्ष दलसँग संवाद कायम राखिने पनि बताए ।